Innovation NEST (INN) – Foleja e Inovacionit, një projekt i TOK Digital Agency ka si synimin kryesor të bëjë bashkë investitorët me startup-et.
“Ne synojmë të gjejmë të rinjtë me idetë e biznesit më interesante në treg,” shprehet Erind Aliçkolli, një nga drejtuesit e INN, “dhe më pas i shoqërojmë këta sipërmarrës të rinj përmes një procesi të gjatë inkubimi”. Përmes moduleve të ndryshme të trajnimit të rinjtë mësojnë ta zhvillojnë edhe më tej idenë e tyre, të kuptojnë e menaxhojnë aspekte të tilla si marketingu, tregu global, menaxhimi financiar, etj, derisa ideja apo biznesi i tyre të jetë konsoliduar mjaftueshëm sa për të tërhequr vëmendjen e investitorëve.
“Në anën tjetër të INN qëndrojnë Engjëjt e Biznesit,” vazhdon Erindi, “një grup investitorësh entuziastë të teknologjisë që janë të bindur se inovacioni mund të ndryshojë thelbësisht sektorë të tillë si Turizmi, Energjia, AgroIndustria, MedTech, bioteknologjia, mjedisi dhe shëndeti, industritë krijuese, etj. Ne synojmë që startup-et t’i shtyjmë drejt zhvillimit të idesë së tyre në drejtime që do të tërhiqnin më shumë vëmendjen e investitorëve.”
Lexoni edhe: Innovation Nest Festival, vjen në Tetor në Tiranë
Nest ka arritur të bëjë bashkë një rrjet të gjerë investitorësh, i cili po zgjerohet vazhdimisht duke u shtrirë edhe në vendet e tjera të Ballkanit. Ata organizojnë shpesh evente ku synojnë të prezantojnë startup-et me investitorët, por megjithatë një nga mundësitë kyçe për të gjetur financim për idenë tuaj apo për të gjetur ide për të financuar është padyshim Innovation Fest. Pas suksesit të jashtëzakonshëm të edicionit të shkuar, këtë vit INN Fest parashikon të ketë mbi 500 pjesëmarrës nga 14 vende të ndryshme të Europës. Sipërmarrës, investitorë, shpikës, politik-bërës, kompani të mëdha ndërkombëtare, entuziastë të teknologjisë – të gjithë do të jenë në arTurbina në datat 24-25 Tetor në një mega-event që do ta shndërrojë Tiranën në kryqendrën ballkanike të teknologjisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
