Gjiganti teknologjik Google ka njoftuar një investim prej 5 miliardë eurosh në Belgjikë për zgjerimin e qendrave të të dhënave dhe infrastrukturës së inteligjencës artificiale, në atë që konsiderohet si një nga investimet më të mëdha teknologjike në historinë e vendit. Projekti pritet të krijojë rreth 300 vende të reja pune dhe të forcojë kapacitetin e të dhënave në rajonin e Valonisë, duke mbështetur ambicien evropiane për zhvillim digjital pa karbon.
Investimi do të përdoret për zgjerimin e kampusit ekzistues të Google në Saint-Ghislain, ku kompania operon që prej vitit 2009. “Me këtë njoftim, Google po thellon praninë e saj në Belgjikë, duke zgjeruar investimet dhe krijuar rrugë të reja për transformim të udhëhequr nga AI,” deklaroi Bikash Koley, zëvendëspresident global për infrastrukturë në Google. Kryeministri belg Bart De Wever e përshkroi projektin si “një gur themeli për ekonominë digjitale dhe tranzicionin energjetik të vendit.” Sipas tij, investimi “është një shenjë besimi në Belgjikën si qendër të inovacionit digjital dhe rritjes së qëndrueshme, duke forcuar njëkohësisht rolin tonë në të ardhmen digjitale të Europës.”
Lexo: BE-ja sjell Wi-Fi falas në të gjitha bashkitë në Shqipëri
Qendrat e reja do të funksionojnë me energji të pastër, të integruara në rrjetin e energjisë së rinovueshme të Belgjikës, në përputhje me objektivat klimatike të BE-së dhe vendit për vitin 2030.
Zhvillimi është pritur veçanërisht mirë në Valoni, ku autoritetet rajonale e konsiderojnë investimin si një shtysë për sovranitetin digjital dhe zhvillimin ekonomik. “Ky projekt konfirmon rolin qendror të Valonisë si një nyje evropiane për përpunimin dhe ruajtjen e të dhënave,” tha Pierre-Yves Jeholet, zëvendëskryeministër i qeverisë së Valonisë.
Kryetarja e bashkisë së Saint-Ghislain, Florence Monier, shtoi se “zhvillimi e bën komunitetin tonë pjesë të një ekosistemi inovativ që krijon mundësi për bizneset e tjera, dhe është detyrë e jona si përfaqësues lokalë të sigurojmë integrim sa më të mirë të projektit.”
Ministri belg i Mbrojtjes dhe Tregtisë së Jashtme, Theo Francken, theksoi nevojën për ruajtjen e ekuilibrit mes bashkëpunimit me kompanitë globale dhe mbrojtjes së interesave kombëtare. “Forcimi i kapaciteteve tona kibernetike kërkon dialog të hapur, por edhe garanci të forta për sovranitetin dhe sigurinë tonë,” tha ai.
Google do të vazhdojë gjithashtu bashkëpunimin me kompaninë belge të telekomunikacionit Proximus, me të cilën po zhvillon shërbime cloud sovrane. “Vendimi i Google për të zgjeruar praninë në Belgjikë e konsolidon rolin tonë si motor i inovacionit digjital në Europë,” deklaroi Fabrice De Windt, CEO i Proximus.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto