Aksionet e kompanisë Amazon humbën 2.6% të vlerës së tyre, dhe sot, 3 mars, çmimi për një aksion është 203 dollarë. Kjo erdhi si pasojë e goditjes me dronë të qendrave të të dhënave të kompanisë në Emiratet e Bashkuara Arabe dhe në Bahrein.
Si pasojë, shërbimet e Amazon u ndërprenë, dhe kompania paralajmëroi se do të duhet kohë për t’i rikuperuar. AWS, pjesa e cloud-it të Amazon që mbështet faqet online, bankat dhe kompanitë ajrore, ka shumë rëndësi. Kur sulmohet infrastruktura e këtyre qendrave, kjo mund të ndikojë te funksionimi i shërbimeve, besimi i klientëve dhe shpejtësia e punëve që bëjnë kompjuterët e tyre.
Lexo edhe: Paratë ”ndjekin” konfliktin, kush po përfiton nga përshkallëzimi SHBA-Iran
Çfarë ndodhi konkretisht
Një qendër në UAE u godit direkt nga dronët iranianë, duke shkaktuar shpërthime dhe zjarr. Qendrat e tjera në UAE nuk u prekën dhe vazhduan të punojnë normalisht. Objekti në Bahrein u ndikua indirekt nga një sulm me dron pranë tij, duke shkaktuar ndërprerje energjie dhe dëmtime të vogla. Për shkak të sulmeve, disa shërbime të Amazon që përdorin klientët për ruajtjen e të dhënave dhe për punë të ndryshme online, si EC2, S3 dhe bazat e të dhënave DynamoDB, patën ndërprerje. Disa banka, si Abu Dhabi Commercial Bank, raportuan se shërbimet e tyre online u ndërprenë përkohësisht, edhe pse nuk e lidhën drejtpërdrejt me Amazon.
Përveç sulmeve, Amazon po zgjeron investimet në Spanjë. Kompania planifikon të shpenzojë 18 miliardë euro shtesë për të hapur më shumë qendra të dhënash dhe për projekte në inteligjencën artificiale, duke e çuar totalin e investimeve në 33.7 miliardë euro.
Aktualisht tregu i aksioneve është i ndjeshëm. Nëse rikuperimi i shërbimeve do të zgjasë, klientët mund të detyrohen të përdorin qendra të tjera për të përfunduar punën e tyre, gjë që mund të sjellë kosto shtesë dhe humbje besimi. Tregtarët po ndjekin me kujdes çdo lajm për rikuperimin e shërbimeve dhe ndikimin te klientët, ndërsa raporti i punësimit në SHBA për shkurtin pritet të publikohet të premten, 6 mars, dhe mund të ndikojë tek tregu apo aksionet e kompanisë prestigjoze.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
