Më 4 nëntor 2025, Shkupi do të shndërrohet sërish në qendrën e tregtisë elektronike në Ballkan. Nën organizimin e Shoqatës së E-Commerce të Maqedonisë (MECA), do të zhvillohet edicioni i 8-të i Konferencës Rajonale për E-Commerce, në skenën e Teatrit Kombëtar të Operës dhe Baletit. Ky event është konferenca më e madhe dhe më me ndikim e këtij lloji në rajon, e cila prej tetë vitesh radhazi bashkon aktorët më të rëndësishëm të industrisë.
Për të tretin vit me radhë, konferenca ka karakter rajonal. Vitin e kaluar ajo mblodhi 742 pjesëmarrës nga e gjithë Ballkani. Sivjet pritet pjesëmarrje edhe më e lartë, pasi interesi është i dukshëm që në fazën e hershme: mbi 300 pjesëmarrës e kanë konfirmuar praninë e tyre paraprakisht.
Edicioni i 8-të sjell disa risi. Për herë të parë, konferenca do të zhvillohet në dy skena: një e dedikuar për fjalimet kryesore, diskutimet në panele dhe bisedat “one-on-one”, dhe një tjetër për punëtori praktike. Gjithashtu, fokusi tematik zgjerohet: krahas e-commerce, këtë vit vëmendja do të jetë edhe tek marketingu dhe inteligjenca artificiale (AI) – dy shtylla kyçe për transformimin digjital dhe rritjen e tregtisë elektronike. Ky zgjerim ka shtuar ndjeshëm interesin e kompanive dhe profesionistëve nga rajoni dhe më gjerë.
Lexo edhe: Prezantohen folësit e parë të konferencës së 7-të për e-commerce
“Presim mbi 800 pjesëmarrës nga sektori i biznesit në Maqedoninë e Veriut dhe në rajon. Folës nga kompani globale si TikTok, Booking, Direct Media dhe Dolce & Gabbana janë tashmë të konfirmuar, ndërkohë që vijojnë negociatat me marka të tjera të njohura botërore. Interesi për pjesëmarrje, partneritete dhe praninë në këtë ngjarje është më i larti deri tani, gjë që na gëzon veçanërisht, sepse dëshmon edhe një herë se ky event jo vetëm që njihet si ngjarja më e madhe e biznesit në Maqedoni, por është gjithashtu shumë i kërkuar dhe i vlerësuar në gjithë rajonin,” theksojnë organizatorët nga Shoqata e E-Commerce të Maqedonisë.
Konferenca do të sjellë fjalime frymëzuese dhe shembuj konkretë nga skena globale dhe rajonale, si dhe diskutime për të ardhmen e e-commerce, marketingut dhe përdorimit të AI në operacionet e përditshme të biznesit. Për të nxitur rrjetëzimin, aplikacioni mobil për rezervimin e takimeve “one-on-one” do të jetë sërish i disponueshëm. Po ashtu, një zonë ekspozite do të prezantojë produktet dhe shërbimet e reja të partnerëve, duke ofruar mundësi për kontakte të drejtpërdrejta dhe bashkëpunime me kompani, startup-e, investitorë, rregullatorë dhe institucione.
Regjistrimi për konferencën është i hapur në faqen zyrtare: https://ecommerceconference.mk.
Si ndjekës
Më shumë detaje për agjendën dhe folësit do të publikohen së shpejti. Konferenca premton një edicion të paharrueshëm, që jo vetëm do të përcaktojë drejtimet e zhvillimit të e-commerce në rajon për vitin 2026 e më tej, por edhe do të frymëzojë me ide konkrete dhe partneritete që do të çojnë përpara gjithë rajonin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto