Një video virale e ka futur në debat gjithë botën e punës, Reid Hoffman, bashkëthemeluesi i LinkedIn, parashikon se puna tradicionale nga ora 9 deri në 5 do të jetë vetëm një kujtim i së kaluarës deri në vitin 2034. Dhe jo, nuk është vetëm një hamendësim. Hoffmani, i njohur për parashikime që janë realizuar më herët, për rrjetet sociale, Airbnb-në dhe fuqinë e inteligjencës artificiale, mendon se përplasja mes AI-së dhe ekonomisë së koncerteve (gig economy) do të transformojë rrënjësisht çdo profesion.
Lexo gjithashtu: “Life is Good”, si dy vëllezër dhe 78 dollarë krijuan një markë botërore që përçon pozitivitet
“Mund të mos punoni më si punonjës i zakonshëm,” – thotë ai. “Mund të keni dy apo tre punë të ndryshme, të gjitha pjesë e ekonomisë së lirë.”
Çfarë do të thotë kjo në praktikë? Më shumë fleksibilitet, por edhe më pak siguri. Kufiri mes jetës personale dhe punës do të fshihet edhe më shumë. Kjo liri e re është ëndrra e shumëkujt, por edhe ankthi i të tjerëve.
Një revolucion që po vjen, dhe nuk pret askënd
Neal Taparia, sipërmarrës dhe investitor, është ndër ata që i japin besim të plotë vizionit të Hoffmanit. Ai shkroi në rrjetin X se “duhet ta dëgjojmë këtë parashikim,” duke kujtuar sesi Hoffman parashikoi në 1997 ngjitjen e rrjeteve sociale, dhe ishte ndër investitorët e parë në Airbnb, kohë kur askush nuk mendonte se do të flinim në shtëpitë e të panjohurve.
Sot, ai po paralajmëron, e njëjta ndodhi do të ndodhë me modelin 9-me-5.
Lexo gjithashtu: Pse Mark Zuckerberg mund të detyrohet të shesë Instagram dhe WhatsApp?!
Por jo të gjithë janë dakord
Jay Zagorsky, profesor në Universitetin e Bostonit, ka një këndvështrim më realist. Ai mendon se puna me orar fiks nuk do të zhduket plotësisht, thjesht do të bashkëjetojë me forma më fleksibël. “Kontrollorët e trafikut ajror, pastruesit, punonjësit e turnit, këto punë nuk zhduken lehtë,” thotë ai. Dhe ka të drejtë, jo çdo profesion mund të përkthehet në një “gig”.
Çfarë do të thotë kjo për të ardhmen?
E thjeshtë,adaptim. Në vend që të luftojmë teknologjinë, duhet të mësojmë ta përdorim atë. Inteligjenca artificiale nuk është armiku ynë, por një bashkëpunëtor i ri, që kërkon trajnim të ri.
Nëse më parë shkollimi ishte një fazë e jetës, tani është një proces i vazhdueshëm. Profesionet do të ndryshojnë. Aftësitë që vlejnë sot, mund të mos kenë asnjë vlerë nesër. Por në këtë kaos, lind edhe mundësia për profesionistë të rinj, më të lirë dhe më krijues se kurrë më parë.
E ardhmja nuk do të presë. A jeni gati të jeni punëmarrësi i ri i epokës së inteligjencës artificiale, që punon nga kudo dhe për këdo?
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
