Forcohet miqësia shekullore mes Austrisë dhe Shqipërisë, tashmë edhe në planin ekonomik dhe atë social - Business Magazine Albania

Forcohet miqësia shekullore mes Austrisë dhe Shqipërisë, tashmë edhe në planin ekonomik dhe atë social


Miqësia shekullore mes Austrisë dhe Shqipërisë forcohet gjithmonë e më shumë. Së fundmi jo thjesht në planin politik e diplomatik, por dhe në atë ekonomik, social, kulturor dhe mbi të gjitha human.

Agjencia Austriake për Zhvillim (ADA), në bashkëpunim me disa partnerë ndërkombëtarë, ka marrë përsipër financimin dhe mbështetjen teknike të disa projekteve në pjesën veriperëndimore të vendit. Ato kanë në fokus përmirësimin e marrëdhënieve të qytetarëve me institucionet shtetërore, ndihmën e shtresave të disavantazhuara, edukimin, mbështetjen e biznesit fason dhe sektorit të energjitikës.

Projekti “Drejtësi pa Vonesa”, në partneritet me OSBE, synon të rrisë cilësinë e procedurave gjyqësore në Shqipëri duke ndërtuar një bashkëpunim mes rretheve gjyqësore, gjykatave të Apelit dhe institucioneve lokale. Aktualisht ky projekt po zbatohet në gjykatën e rrethit gjyqësor Lezhë. Vitin e fundit është arritur të ulet me 20% ngarkesa e përgjithshme e gjykatësve.

Me OSBE po punohet gjithashtu për ndërtimin e një ure lidhëse mes parlamentit dhe qytetarëve. Krijimi i Zyrave Rajonale Parlamentare kërkon të lehtësojë lidhjen mes deputetëve dhe qytetarëve. Një qëllim i veçantë i kësaj nisme të filluar në Shkodër, është angazhimi i të rinjve në jetën parlamentare duke u ofruar atyre akses për më shumë informacion mbi politikat dhe proceset legjislative.

Ekonomia zë një pjesë jo të vogël të këtyre investimeve ku më kryesori është hidrocentrali i Ashtrës, pranë Vaut të Dejës. Ky impiant u përcjell energji rreth 100.000 familjeve. Përveç krijimit të vendeve të reja të punës, ai garanton furnizim konstant energjie, gjë që redukton importin e saj. Natyra përreth mbetet e padëmtuar pasi HEC-i nuk prodhon mbetje.

ADA i vjen në ndihmë edhe biznesit fason me një formulë që garanton zhvillim të konsoliduar e afatgjatë. Ajo ofron asistencë teknike përmes trajnimit të nxënësve dhe mësuesve të Qendrës së Formimit Profesional Publik në Kavajë, Krujë e Tiranë. Pas përgatitjes në këtë institucion, të trajnuarit punësohen në një prej bizneseve që kanë firmosur marrëveshjen e bashkëpunimit me ADA-n.

Një aspekt tjetër në të cilin ADA ka investuar fuqishëm është edhe ai social. Janë tre projekte të tillë, ku shtrirjen më të madhe në kohë dhe hapësirë, e zë zhvillimi i qendrës ditore të kujdesit për personat me aftësi të kufizuara. Kjo qendër që funksionon tanimë prej 9 vitesh, ka si objektiv integrimin e 750 personave me aftësi të kufizuara në zonën e Vaut të Dejës, Lezhës dhe Laçit.

Koordinatorja Elona Mehmetaj përmendi disa nga arritjet e kësaj pune shumëvjecare: “Kemi arritur të nxisim një bashkëpunim lokal me institucionet që kanë përgjegjësi më të madhe. Në mjediset e kësaj qendre këshillimi, ne shohim se këta persona janë të aftë të artikulojnë nevojat e tyre, të njohin të drejtat e tyre dhe t’i kuptojnë ato.”

Por në vëmendje të agjencisë austriake është edhe edukimi i fëmijëve, e sidomos atyre që vijnë nga shtresa të dizavantazhuara si komuniteti rom dhe egjiptian. Hapja e qendrës edukative “Mundësia e Dytë” në Fushë-Krujë, u jep shansin fëmijëve që e kanë lënë herët shkollën apo që nuk kanë patur kurrë mundësinë ta ndjekin atë, të ripërfshihen në programin publik shkollor me zbatimin e një modeli alternativ.

Në anën tjetër, shkolla “Peter Mahringer’’ në Shkodër, e profilizuar në IT, jo vetëm pajis nxënësit e saj me njohuritë më bashkëkohore të fushës, por dhe u ofron atyre mundësinë të vazhdojnë studimet e larta në Austri pas përfundimit të gjimnazit.

Janë këto disa nga projektet e Agjencisë Austriake të Zhvillimit që po realizohen aktualisht. Por ADA dhe në veçanti shteti austriak kanë qenë pothuajse përherë të pranishëm me programe të tilla në Shqipëri. Pse u mendua që pikërisht tani të ketë një mbulim sa më të gjerë mediatik të këtyre aktiviteteve?

Shefi i zyrës së agjencisë, Heinz Habertheuer, tha se kjo bëhet për të rritur ndërgjegjësimin dhe vëmendjen e njerëzve për veprimtarinë e ADA-s, pasi ishte konstatuar se në publikun e gjerë shqiptar, por dhe austriak diçka e tillë mungonte. “Ne duam gjithashtu t’u bëjmë transparente taksapaguesve austriakë se ku shkojnë paratë e tyre, sepse ADA financohet nga fondet shtetërore” – sqaroi ai.

Mungesa e vëmendjes së përgjithshme popullore mund të mungojë, por produkti i mirë s’ka nevojë për shumë publicitet dhe kjo shihej qartë në çdo pikë ndalese të udhëtimit. Besimi dashamirësia dhe lidhja historike mes vendeve tona vijon të forcohet gjithmonë e më shumë.

burimi: javanews.al

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #34 - Mars 2024

Për një vit të mbarë!

Viti 2024 ka nisur me sfidat dhe mundësitë e tij. Ndërsa kompanitë do të duhet të përballen me disa ndryshime ligjore dhe njëkohësisht trendet e tregjeve: si rritje çmimesh dhe rritje e kostos së fuqisë punëtore, startupet janë para mundësive dhe një klime favorizuese. Thirrje të shumta janë hapur në fushën e biznesit, kulturës dhe ideve të gjelbërta. Ndër më të rëndësishmit, programi i qeverisë për financimin e 80 startupeve në tre faza zhvillimi të tyre

Për të kuptuar rëndësinë e bizneseve të reja, veçanërisht në teknologji, mjafton të shohim që edhe sipërmarrje të konsoliduara vendase, si një grup kompanish si Balfin, kanë një vëmendje të theksuar tek startupet. Z. Samir Mane, President i këtij grupi, prej kohësh ka treguar interes, duke i mbështetur, por edhe duke investuar në një prej startupeve që pritet të sjellë revolucion në bio-inxhinieri. Vëmendja tek risia dhe inovacioni vlerësohet të jetë një nga arsyet kryesore, përse audienca jonë e zgjodhi në kompeticionin tonë të dhjetorit si Sipërmarrësi i Vitit. Në një intervistë ekskluzive, z. Mane tregon për ne copëza domethënëse nga …

Shiko më shumë
Na ndiqni në rrjetet sociale
0