Bordi i drejtorëve Ekzekutivë të FMN-së miratoi rishikimin e pestë dhe të gjashtë të marrëveshjes me Shqipërinë duke i hapur rrugë disbursimit të këstit prej 72.4 milionë eurosh.
Zëvendësdrejtori i Përgjithshëm i FMN-së, Min Zhu, deklaroi në Uashington se rimëkëmbja e ekonomisë shqiptare po ecën sipas programit, ndonëse ekzistojnë risqe. Sipas tij, autoritetet shqiptare kanë treguar një performancë të fortë duke përmbushur objektivat e marrëveshjes me FMN-në, përfshirë zbatimin e reformave strukturore të vështira dhe ambicioze.
Në njoftimin zyrtar FMN-së thuhet se autoritetet shqiptare duhet të vazhdojnë programin e reformave dhe të përfitojnë nga progresi thelbësor që kanë arritur deri më tani për të përshpejtuar rritjen ekonomike të vendit.
Por, në njoftim e FMN-së ka edhe disa rekomandime për qeverinë. Së pari, duke vlerësuar se qëllimi i qeverisë për të vazhduar konsolidimin fiskal është ai i duhuri, FMN i kërkon asaj të reduktojë mbështetjen në masat e përkohshme dhe të shmange përjashtimet fiskale apo vendosjen e normave preferenciale. Një kërkesë kjo që duket e lidhur me masën e fundit të qeverisë për të përjashtuar nga taksat 83 mijë bizneset të vogla.
Por, veç kritikave për përjashtimet tatimore, FMN i tërheq vëmendjen qeverisë edhe në një drejtim tjetër, që lidhet me mënyrën se si ajo po përpiqet të luftojë informalitetin. Sipas FMN-së, përpjekjet e autoriteteve shqiptare për të përmirësuar mbledhjen e taksave duhet të përputhen më mirë me praktikat më të mira ndërkombëtare dhe duhet të mbështeten në përmbushjen vullnetare të detyrimeve tatimore.
Në fund, Fondi i bën thirrje për kujdes edhe për koncesionet duke kërkuar që ato të vlerësohen në mënyrë transparente në llogaritë fiskale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
