Një hap i rëndësishëm drejt një prodhimi ushqimor më të mirë, të qëndrueshëm dhe të përballueshëm është bërë me hapjen e fermës së parë vertikale në botë për kultivimin e luleshtrydheve në ambiente të mbyllura, në Richmond, Virxhinia. Kjo iniciativë mbështetet nga një ekip ndërkombëtar shkencëtarësh që e shohin këtë fazë të re të bujqësisë si një mundësi për të lehtësuar kërkesat globale për ushqim.
Ferma Plenty Richmond është projektuar për të prodhuar më shumë se 1.8 milion kilogramë luleshtrydhe çdo vit, të rritura vertikalisht në brendësi të kullave 9 metra të larta, duke zënë më pak se 40,000 metra katrorë – më pak se një hektar. Kjo është një sipërfaqe shumë më e vogël krahasuar me bujqësinë tradicionale të luleshtrydheve, e cila varet nga kushtet klimatike dhe sezoni. Kompania thotë se luleshtrydhet, që janë nga kompania globale Driscoll’s, do të jenë në treg në fillim të vitit 2025.
“Ferma Plenty do të rrisë prodhimin bujqësor lokal dhe do të nxisë zhvillimin ekonomik, duke dhënë kontribut kundrejt rreziqeve të mundshme të këtij sektori dhe duke mbrojtur mjedisin,” tha Guvernatori i Virxhinias, Glenn Youngkin. “Ne presim me kënaqësi mbështetjen e qasjeve të tyre inovative për të revolucionarizuar industrinë.”
Lexo edhe: Studimi i ri zbulon se cila është aftësia numër 1 që punëdhënësit kërkojnë te aplikantët
Derisa kultivimi vertikal është përdorur kryesisht për prodhimin e sallatave, kjo teknologji e re ka zgjeruar mundësitë për kultivimin e frutave të tjera. Me kontroll të temperaturës, ndriçimit dhe lagështisë në 12 dhoma të ndryshme kultivimi, edhe procesi i pllenimit është bërë më efikas se ai natyror. Kjo pritet të sjellë fruta më të njëtrajtshme dhe më pak mbetje.
“Kjo fermë është një model për ndikimin pozitiv që mund të ketë bujqësia pa varësi nga klima, dhe dëshmon se kultivimi vertikal mund të sjellë diversitetin e nevojshëm për të përballuar sfidat globale ushqimore,” tha CEO i Plenty, Arama Kukutai. “Ferma Plenty Richmond është kulminacioni i më shumë se 200 eksperimenteve kërkimore gjatë gjashtë viteve të fundit për të perfeksionuar rritjen e luleshtrydheve në ambiente të mbyllura me shije të njëtrajtshme gjatë gjithë vitit.”
Ferma vertikale në Richmond përdor 97% më pak tokë dhe deri në 90% më pak ujë se bujqësia tradicionale, duke eliminuar përdorimin e pesticideve dhe duke ulur rreziqet për kulturat falë një ambienti të kontrolluar dhe një zinxhiri furnizimi më të shkurtër.
Ky projekt inovativ shihet si një hap i madh përpara drejt prodhimit të ushqimit në mënyra të reja dhe më efikase, duke përfituar si konsumatorët ashtu edhe mjedisi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
