Emirates ka nënshkruar një Memorandum mirëkuptimi (MoU) me Crypto.com për të eksploruar mënyrat e integrimit të platformës Crypto.com Pay në sistemet e saj të pagesave, duke ruajtur standardet më të larta të sigurisë dhe përputhshmërisë. Integrimi pritet të hyjë në fuqi vitin e ardhshëm.
Memorandumi u nënshkrua në praninë e Lartmadhërisë së Tij, Sheikh Ahmed bin Saeed Al Maktoum, Kryetar dhe Drejtues Ekzekutiv i Emirates Airline & Group, dhe Michael Doersam, Shef i Financës dhe Shërbimeve të Grupit në Emirates, nga Adnan Kazim, Zëvendës President dhe Shef i Komercializimit në Emirates, dhe Mohammed Al Hakim, President i operacioneve të Crypto.com në Emiratet e Bashkuara Arabe.
Adnan Kazim deklaroi:
“Partneriteti me Crypto.com për të integruar kriptovalutat në sistemin tonë të pagesave digjitale reflekton përkushtimin e Emirates për të përmbushur preferencat në zhvillim të klientëve, si dhe për të tërhequr segmentet më të reja dhe të prira ndaj teknologjisë, të cilat preferojnë monedhat digjitale. Ky hap strategjik është në përputhje me vizionin e Dubait për të qenë lider global në inovacionin financiar, ndërkohë që i ofrojmë klientëve më shumë fleksibilitet dhe zgjedhje në mënyrën se si kryejnë pagesat me Emirates.”
Ndërkohë, Eric Anziani, President dhe COO i Crypto.com, shtoi:
“Jemi të lumtur që finalizuam këtë Memorandum të rëndësishëm me Emirates Airline. Ndërsa zgjerojmë përdorimin e përditshëm të kriptomonedhave, integrimi me partnerë të jashtëzakonshëm si Emirates do të sjellë një vrull të ri në industrinë e aseteve digjitale dhe do t’u mundësojë të dy kompanive të ofrojnë zgjidhje financiare vërtet inovative për klientët tanë. Me padurim presim të punojmë së bashku për të zhvilluar më tej ofertën tonë në tregun e Gjirit.”
Përveç integrimit të Crypto.com Pay, të dyja kompanitë do të eksplorojnë edhe mundësinë e realizimit të fushatave të përbashkëta promovuese dhe marketingu për të rritur ndërgjegjësimin dhe për të nxitur përdorimin e kësaj zgjidhjeje të re pagese.
Ky partneritet i fundit i Emirates vjen në një kohë kur Dubai po pozicionohet si një qendër globale për kriptovalutat, e mbështetur nga një ekosistem i qëndrueshëm dhe një kuadër rregullator i sofistikuar, i krijuar për të nxitur inovacionin dhe për të garantuar mbrojtjen e investitorëve dhe stabilitetin financiar. Një numër i konsiderueshëm kompanish në Dubai tashmë pranojnë kriptovaluta si formë pagese, duke nisur nga zhvilluesit e pasurive të paluajtshme e deri tek kompanitë kryesore të telekomunikacionit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English