Një nga investitorët më të njohur në teknologji në Europë ka ngritur shqetësimin se kontinenti po bëhet tepër i varur nga kompanitë amerikane për teknologjinë hapësinore dhe duhet të ndërmarrë hapa urgjentë për të ndërtuar kapacitetet e veta. Sipas një raporti të Financial Times, Bernard Liautaud, partner i lartë në fondin e investimeve Balderton Capital, i cili ka financuar kompani si Revolut, ka deklaruar se Europa po bëhet “tepër e varur” nga SHBA, dhe veçanërisht nga SpaceX, kompania e drejtuar nga Elon Musk.
Liautaud e cilësoi këtë varësi si një “rrezik të madh” për kontinentin dhe theksoi se “duhet të bëhemi më të vetë-mjaftueshëm”, sidomos për sa i përket teknologjive të sigurisë dhe mbrojtjes. Ai tha se betejat për supremacinë ushtarake në të ardhmen do të zhvillohen gjithnjë e më shumë në hapësirë, përveç tokës, detit apo ajrit. Aktualisht, SpaceX është forca dominuese në lëshimin e satelitëve dhe ofrimin e komunikimeve nga hapësira, gjë që sipas tij lë Europën të ekspozuar dhe të pambrojtur në një sektor strategjik.
Lexo edhe: Amazon pezullon shpërndarjet me dron pas një aksidenti në Arizona
Investimet europiane në teknologji mbrojtëse po rriten ndjeshëm
Në të njëjtin raport thuhet se investimet në startup-e europiane që zhvillojnë teknologji për mbrojtje janë rritur ndjeshëm gjatë këtij viti. Rritja vjen si pasojë e shtimit të buxheteve ushtarake nga vendet anëtare të NATO-s, pas fillimit të luftës në Ukrainë.
Kjo bum investimesh ka nxitur krijimin e dhjetëra kompanive të reja që punojnë në zhvillimin e teknologjive ushtarake, përfshirë drone, softuer për fushëbetejat dhe sisteme të tjera mbrojtëse. Megjithatë, Liautaud paralajmëroi se duhet të bëhet shumë më tepër për të ndërtuar kapacitete të mirëfillta europiane për lëshimin e satelitëve dhe për krijimin e sistemeve mbrojtëse të bazuara në hapësirë.
Ndërkohë, një tjetër partner i Balderton Capital, Suranga Chandratillake, theksoi se investimi në kompani të mbrojtjes kërkon një qasje të veçantë ndaj menaxhimit të riskut. Ai shtoi: “Njëzet e pesë vite më parë, kur përpiqeshe të zgjidhje këto probleme, Europa do të ishte një nga vendet e fundit ku do të kërkoje startup-e. Sot, ato janë pjesë kyçe e zgjidhjes.”
Ky ndryshim shënon një ndryshim të madh në mënyrën se si qeveritë europiane i shohin startup-et, të cilat nuk konsiderohen më si shumë të rrezikshme apo pa përvojë, por si partnerë të domosdoshëm në ndërtimin e kapaciteteve moderne të mbrojtjes.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
