OpenAI dhe Amazon kanë nënshkruar një marrëveshje në vlerë prej 38 miliardë dollarësh (33 miliardë euro) që i mundëson krijuesit të ChatGPT të ekzekutojë sistemet e tij të inteligjencës artificiale (IA) në qendrat e të dhënave të Amazon në SHBA.
Si pjesë e marrëveshjes, e cila u njoftua të hënën, OpenAI do të mund të përdorë mjetet e tij të AI-së duke përdorur “qindra mijëra” çipa të specializuar të AI-së nga Nvidia përmes Amazon Web Services (AWS). Aksionet e Amazon u rritën me 4% pas njoftimit. Kjo marrëveshje vjen më pak se një javë pasi OpenAI ndryshoi partneritetin e saj me mbështetësin e kahershëm Microsoft, i cili deri në fillim të këtij viti kishte qenë ofruesi ekskluziv i shërbimeve cloud për startup-in. Rregullatorët e Kalifornisë dhe Delaware miratuan gjithashtu javën e kaluar lëvizjen e OpenAI-t, fillimisht e themeluar si jofitimprurëse, për të ecur përpara me planet për të krijuar një strukturë të re biznesi, të dizajnuar për të rritur kapitalin më lehtë dhe për të operuar me fitim. “Përparimi i shpejtë i teknologjisë së AI-së ka krijuar një kërkesë të paprecedentë për fuqi kompjuterike,” tha Amazon në një deklaratë të hënën. Ajo shtoi se OpenAI “do të fillojë menjëherë të përdorë fuqinë kompjuterike të AWS si pjesë e këtij partneriteti, me kapacitetin e plotë që pritet të vendoset para fundit të vitit 2026, dhe potencialin për t’u zgjeruar më tej në vitin 2027 dhe më vonë.”
Zhvillimi i AI-së kërkon sasi të jashtëzakonshme energjie dhe kapaciteti kompjuterik. OpenAI ka treguar prej kohësh se i nevojitet më shumë infrastrukturë si për të zhvilluar sisteme të reja të IA-së, ashtu edhe për të mbajtur në funksionim produktet ekzistuese, si ChatGPT, për qindra miliona përdoruesit e tij. Kompania ka angazhuar së fundmi mbi 1 trilion dollarë (870 miliardë euro) për shpenzime të lidhura me AI-në, duke përfshirë projekte të qendrave të të dhënave me Oracle dhe SoftBank dhe marrëveshje për furnizimin me gjysmëpërçues me Nvidia, AMD dhe Broadcom. Disa nga këto marrëveshje kanë ngritur shqetësime tek investitorët për natyrën e tyre “rrethore”, pasi OpenAI ende nuk është fitimprurës dhe aktualisht nuk mund të paguajë për të gjithë infrastrukturën që ofrojnë partnerët e tij cloud, duke u mbështetur në pritshmëritë e kthimit të fitimeve në të ardhmen. CEO i OpenAI, Sam Altman, i hodhi poshtë këto shqetësime javën e kaluar, duke i cilësuar si spekulime “të paqëndrueshme”. “Të ardhurat po rriten ndjeshëm. Ne po vëmë bast se kjo rritje do të vazhdojë,” tha Altman në një dalje në podcast së bashku me CEO e Microsoft, Satya Nadella. Amazon është tashmë ofruesi kryesor i shërbimeve cloud për startup-in e IA-së Anthropic, një rival i OpenAI që po zhvillon chatbot-in Claude.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
