Një version i rrallë dorëshkrimi i Sonetit 116 të Shekspirit, i zbuluar nga studiuesja Dr. Leah Veronese nga Universiteti i Oksfordit, hedh dritë mbi mënyrën se si kjo poezi u ripërdor politikisht gjatë Luftës Civile Angleze dhe u kthye në këngë.
Në një nga zbulimet më intriguese letrare të viteve të fundit, Dr. Leah Veronese, nga Fakulteti i Gjuhës Angleze në Universitetin e Oksfordit, ka gjetur një kopje të panjohur më parë të Sonetit 116 të Shekspirit. Dorëshkrimi ishte i fshehur në një përmbledhje poetike të shekullit të 17-të, mes dokumenteve të Elias Ashmole, një mbështetës i monarkisë dhe themelues i Muzeut Ashmolean.
Lexo gjithashtu: Titaniku “ringjallet” në 3D, zbulohen të vërteta të reja për momentet e fundit të anijes legjendare
Ky është vetëm dorëshkrimi i dytë i njohur ndonjëherë i këtij soneti.
Një poezi me më shumë sesa dashuri
Në vend që të fillojë me vargjet e famshme:
“Let me not to the marriage of true minds
Admit impediments; love is not love…”
…versioni i sapo zbuluar fillon me:
“Self-blinding error seize all those minds
Who with false appellations call that love…”
Kjo ndryshon rrënjësisht tonin e poezisë, nga një reflektim për dashurinë e vërtetë, në një thirrje kundër hipokrizisë dhe tradhtisë, që në kontekstin e kohës lexohet si një apel për besnikëri politike dhe fetare.
Lexo gjithashtu: “Vaksina psikologjike” kundër lajmeve të rreme/ Si mund të mbrohemi nga dezinformimi online?
Dr. Veronese shpjegon se për shumë vite, kjo poezi ishte gabimisht identifikuar në katalog si thjesht “mbi qëndrueshmërinë në dashuri” dhe pa përmendur emrin e Shekspirit, çka ka bërë që ajo të mbetet e panjohur për gati katër shekuj.
Nga poezi në këngë sekrete
Në dorëshkrim, soneti është vendosur mes poezive satirike dhe këngëve të ndaluara, një nga të cilat është adaptimi i tij në këngë nga kompozitori Henry Lawes. Kjo version muzikor shton 7 vargje të reja dhe ndryshon jo vetëm fillimin, por edhe fundin e poezisë. Ndërkohë që vetë partitura ndodhet në Bibliotekën Publike të Nju Jorkut, dorëshkrimi përmban vetëm tekstin.
Në kohën e regjimit republikan, performanca publike e këngëve ishte e ndaluar. Artistë si Lawes i mbijetonin kësaj kohe duke i kënduar fshehurazi në shtëpi dhe kjo poezi është dëshmi e atyre përpjekjeve.
Një Shekspir ndryshe nga ai i dashurisë moderne
Profesorja Emma Smith, një nga ekspertet më të njohura të Shekspirit në Oksford, thotë:
“Ky zbulim i jashtëzakonshëm tregon se arkivat ende kanë sekrete. ‘Let me not to the marriage of true minds’ sot është një nga sonetet më të famshme, por në kohën e Shekspirit nuk kishte aq popullaritet. Dhe tani shohim se është ripërdorur jo për dasma moderne, por si një manifest politik.”
Ky zbulim hedh dritë jo vetëm mbi trashëgiminë e Shekspirit, por edhe mbi mënyrat e shumta në të cilat teksti poetik mund të transformohet për të pasqyruar epoka të ndryshme, dashuri, luftë dhe besnikëri politike.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
