Dorëzohet drafti i propozuar nga shoqëria civile për unifikimin e taksave të karburantit

Ekspertët konstatojnë se peshën më të madhe të çmimit të lartë të karburantit në Shqipëri e zënë taksat.

Shqiptarët në furnizimin me karburant paguajnë përpos çmimit të naftës edhe tre taksa, të qarkullimit, karbonit dhe akcizën.

Nga 173 lekë për litër që është çmimi i një litri nafte, 105 lekë janë taksa. Ulja e nivelit të takimit të naftës dhe benzinës vjen i draftuar nga shoqëria civile në një propozim të depozituar në Kuvendin e Shqipërisë. Aty kërkohet unifikimi i tre taksave në një të vetme dhe ulja e saj në raport me të ardhurat në xhepat e shqiptarëve.

Çdo qytetar që ka një automjet kur blen karburantin paguan në çmimin e naftës apo benzinës edhe 3 taksa, 37 lekë akcizë, 27 lekë për qarkullimin dhe 3 lekë për karbonin, duke zënë edhe peshën më të madhe të kostos së karburantit për qytetarët.

Ndryshimet për uljen e nivelin e taksimit vijnë përmes një drafti të shoqërisë civile i depozituar në Kuvendin e Shqipërisë dhe në qeveri.

Aktivisti i shoqërisë civile, Panajot Soko, arguementon amendimet e kërkuara.

Panajot Soko: Heqja e shumëllojshmërisë së taksave që i vishen produkteve energjitike, kryesisht karburanteve bëhet më e thjeshtë me kalimin në një taksë, taskën akcizore që mund të referohet ose si akcizë ose si taksë kombëtare. Sot nga një çmim 172-173 lekë që është mesatarisht në treg, 105 lekë janë taksa, ndërsa pjesa tjetër është e gjithë industria që përfshin kostot e veta.

Rishikimi i saj lind si nevojë edhe për shkak të përplasjes që ajo has me taksën ndaj koncesionit të rrugëve, sikurse do të ndodhë me Rrugën e Kombit.

Panajot Soko: Pra ne paguajmë taksën e qarkullimit por duhet të paguajmë dhe 5 euro për koncesionarin. Kjo sjell një përplasje. Ulja e nivelit të taksimit të naftës do të kursejë në xhepat e qytetarëve 25 lekë për çdo litër dhe buxheti i shtetit do të marrë 200 milionë $.

Panajot Soko: Kostoja e buxhetit për shkak të uljes së çmimit të naftës është rreth 100 milionë $ dhe përfitimet që merr për shkak të stimulimit të konsumit shkojnë në 200 milionë $.

Në mbështetje të këtij draft-propozimi, shoqëria civile do ta shoqërojë edhe me protesta.

Panajot Soko: Nuk do të ketë as fjalime, as thirrje. Qytetarët e heshtur, të shqetësuar do të qëndrojnë aty përreth dy orë. Kjo gjë do të vazhdojë ditë për ditë.

Nga taksa e qarkullimit, shteti shqiptar mbledh 15 miliardë lekë të ardhura, nga ku 5 miliardë lekë shkojnë për rikonstruksionin e rrugëve, ndryshe nga sa përcakton strategjia e dakordësuar 8 miliardë lekë.

DRAFTI I PROPOZUAR

25 lekë/litër kursen qytetari

200 milionë $ fiton buxheti i shtetit

Burimi: gazetaexpress.com