Në një treg pune të mbushur me konkurrencë, diferencimi është çelësi i suksesit. Pikërisht këtë strategji ndoqi Lukas Yla, një i diplomuar në marketing nga Lituania, i cili u bë viral falë mënyrës unike me të cilën aplikoi për punë në San Francisko.
Në vend që të dërgonte një CV tradicionale përmes emailit apo platformave të zakonshme të punësimit, Lukas zgjodhi një rrugë më kreative dhe të guximshme. I maskuar si një shpërndarës i Postmates, ai dorëzoi personalisht kutitë me donuts (petulla amerikane) te drejtuesit e kompanive të teknologjisë dhe marketingut në qytet. Por surpriza më e madhe ndodhej brenda kutisë: CV-ja e tij, e shoqëruar me një mesazh plot humor:
“Shumica e CV-ve përfundojnë në koshin e plehrave. E imja – në barkun tuaj.”
Rezultati? Një sukses i jashtëzakonshëm.Kjo qasje e pazakontë e ndihmoi Yla-n të dallohej menjëherë. Nga 40 “dorëzime” që bëri, ai arriti të sigurojë 10 intervista pune me disa nga kompanitë më të njohura në San Francisko.
Lexo edhe:Lançohet ” Bytes & Books”, klubi i parë i librit mbi ndikimin e teknologjisë në shoqëri!
Në një intervistë, ai tregoi se qëllimi i tij ishte të tërhiqte vëmendjen e drejtuesve të kompanive në mënyrë kreative dhe të tregonte aftësitë e tij në marketing përmes një shembulli praktik. Dhe ia doli me sukses!
Historia e Lukas Yla është një dëshmi e fuqisë së kreativitetit dhe guximit në botën profesionale. Në një treg gjithnjë e më të mbushur me talente, gjetja e një mënyre unike për t’u veçuar mund të jetë çelësi i suksesit. Jo gjithmonë është e nevojshme të ndjekim rregullat tradicionale—ndonjëherë, një qasje ndryshe mund të na çojë më shpejt drejt qëllimit. Nëse jeni në kërkim të një pune apo doni të bëni përshtypje te një punëdhënës i ardhshëm, ndoshta është koha të mendoni jashtë kornizave.
Dhe kush e di, ndoshta një kuti me ëmbëlsira mund të jetë bileta juaj drejt intervistës së ëndrrave!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
