Cili është mendimi i Zuckerberg mbi DeepSeek?

Meta raportoi të ardhura më të larta se pritshmëritë e Wall Street për tremujorin e katërt, por paralajmëroi se shitjet për tremujorin e parë të këtij viti mund të mos arrijnë projeksionet, duke dhënë sinjale të përziera mbi suksesin e investimeve të kushtueshme në inteligjencën artificiale.

Kompania mëmë e Facebook dhe Instagram pret që të ardhurat për tremujorin e parë të variojnë midis 39.5 miliardë dhe 41.8 miliardë dollarë, ndërsa analistët parashikuan mesatarisht 41.72 miliardë dollarë, sipas të dhënave të LSEG.

Aksionet e Meta mbetën të qëndrueshme pas mbylljes së tregut, por u rritën pasi CEO Mark Zuckerberg foli optimist për iniciativat e Meta në fushën e AI dhe theksoi besimin e kompanisë se burimi i hapur është strategjia e duhur, pas lançimit të AI-së DeepSeek nga një kompani kineze, e cila shkaktoi luhatje të mëdha në tregjet globale. “Do të krijohet një standard global për AI me burim të hapur,” tha Zuckerberg në një telefonatë me investitorët. “Është e rëndësishme që ky standard të jetë amerikan.” Parashikimi i Meta ka ngritur pyetje të reja mbi shpenzimet kapitale të kompanisë. Meta vazhdon të mbështetet te të ardhurat nga reklamat në rrjetet e saj sociale për të financuar ambiciet e saj në AI dhe investimet në teknologjitë e metaverse, si syzet inteligjente dhe sistemet e realitetit të shtuar. Javën e kaluar, Zuckerberg njoftoi se Meta planifikon të shpenzojë deri në 65 miliardë dollarë në vitin 2025 për të zgjeruar infrastrukturën e saj të AI-së dhe për të rritur punësimet në këtë fushë. Të mërkurën, Meta bëri të ditur se shpenzimet e saj totale për vitin 2025 pritet të arrijnë midis 114 miliardë dhe 119 miliardë dollarë, në rritje nga 95 miliardë dollarë që ishin në 2024. “Rezultatet e fuqishme të Meta për tremujorin e katërt tregojnë qartë se të ardhurat nga reklamat mbeten burimi kryesor i fitimeve të kompanisë. Por pyetja kryesore për vitin 2025 nuk lidhet me fitimet e sotme—është nëse basti prej 60-65 miliardë dollarësh i Mark Zuckerberg për AI-në do të japë rezultat,” tha Jeremy Goldman, analist kryesor në eMarketer. Numri i përdoruesve aktivë ditorë në familjen e aplikacioneve të Meta u rrit 5% nga një vit më parë, duke arritur në 3.35 miliardë përdorues.

Lexo edhe:Plug and Play lançon programin e akseleratorit për startup-et shqiptare, Tirana qendër inovacioni

DeepSeek sfidon Meta dhe kompanitë amerikane

Rezultatet e Meta vijnë në një moment kur startup-i kinez DeepSeek prezantoi modelet e tij të reja të AI-së, duke shkaktuar një shitje masive të aksioneve në sektorin e teknologjisë në tregjet globale të hënën, për shkak të shqetësimeve mbi kostot në rritje të AI-së në SHBA. DeepSeek ka deklaruar se modelet e saj konkurojnë ose tejkalojnë ato të rivalëve më të mëdhenj amerikanë, përfshirë Llama e Meta, por me një kosto shumë më të ulët. Kjo sfidon idenë se ndërtimi i modeleve të avancuara të AI-së kërkon investime gjigante në kapacitetet e llogaritjes dhe fuqinë kompjuterike. Zuckerberg pranoi se është ende herët për të vlerësuar ndikimin e DeepSeek në strategjinë e investimeve të Meta, por shtoi se kompania mund të mësojë nga përparimet e startup-it kinez. “Ka disa avancime që ata kanë bërë dhe që shpresojmë t’i implementojmë edhe në sistemet tona,” tha ai. Ky zhvillim mund të rrisë presionin nga investitorët e shqetësuar për shpenzimet e larta të Meta në AI, por nga ana tjetër, mund të rezultojë i dobishëm nëse sjell një ulje të kostove për ndërtimin dhe mbështetjen e modeleve të AI-së. Meta, një nga blerësit më të mëdhenj të çipave AI të Nvidia, synon të përfundojë vitin me mbi 1.3 milionë GPU dhe të sjellë 1 gigavat fuqi kompjuterike online, sipas një postimi të Zuckerberg në Facebook të premten mbi objektivat e shpenzimeve për 2025. Ai gjithashtu njoftoi se Meta do të shkurtojë 5% të punonjësve me performancën më të ulët dhe paralajmëroi për shkurtime të mëtejshme këtë vit për të rritur efikasitetin.

NYP