OpenAI, kompania që qëndron pas ChatGPT, ka shprehur interes për të blerë Chrome – nëse Google detyrohet ta shesë. Deklarata u bë nga drejtuesi i OpenAI, Nick Turley, gjatë dëshmisë së tij në një proces gjyqësor për antitrust që po zhvillohet në Shtetet e Bashkuara kundër gjigantit të teknologjisë Google.
Departamenti Amerikan i Drejtësisë (DOJ) kërkon që Google të ndahet në pjesë të veçanta, duke argumentuar se ka një dominim të tepruar në tregun e kërkimeve online. Nga ana tjetër, Google ka deklaruar se Chrome nuk është në shitje dhe ka kërkuar që padia të hidhet poshtë. Sipas të dhënave të Similarweb, rreth 64% e përdoruesve të internetit në botë përdorin Chrome, ndërsa Safari i Apple zë vendin e dytë me 21%. Turley dëshmoi në gjyqin që po zhvillohet në Washington DC – një prej disa proceseve të ngjashme që janë ngritur nga DOJ kundër gjigantëve të teknologjisë, përfshirë edhe çështje që lidhen me rrjetet sociale, kërkimet online dhe inteligjencën artificiale. Në një vendim të mëparshëm, gjykata gjeti se Google kishte monopol në kërkimet online. Javën e kaluar, ajo u shpall fajtor për krijimin e një monopoli të paligjshëm edhe në teknologjinë e reklamimit online. Google ka bërë me dije se do të apelojë të dyja vendimet. Shefja e çështjeve rregullatore në Google, Lee-Anne Mulholland, ka shkruar në një blog se propozimet e qeverisë amerikane “do të dëmtonin konsumatorët amerikanë, ekonominë dhe udhëheqjen teknologjike të vendit”.
Lexo edheTronditje në teknologji: BE godet Apple dhe Meta me gjoba marramendëse
Dominimi i Google dhe ndikimi i AI
Gjyqi aktual po shqyrton mënyrat se si mund të frenohet dominimi i Google në kërkimin online, sidomos në kontekstin e rritjes së shpejtë të shërbimeve të AI gjenerues si ChatGPT. Modelet e reja të inteligjencës artificiale përdorin internetin për të përmirësuar rezultatet dhe për të reduktuar gabimet e njohura si “hallucination”, që kanë qenë problematike për zhvilluesit që nga përhapja e chatbot-ëve. Sipas Turley, vitin e kaluar OpenAI i ka bërë një ofertë Google për një bashkëpunim që do të mundësonte integrimin e rezultateve të kërkimit të Google në ChatGPT – ofertë që, sipas tij, u refuzua. “Sot nuk kemi asnjë partneritet me Google,” deklaroi ai për Reuters. Megjithatë, OpenAI ka një partneritet të fuqishëm me Microsoft-in, i cili zotëron shfletuesin Edge dhe motorin e kërkimit Bing. Nga ana tjetër, edhe Google ka zhvilluar produkte të veta të AI si Gemini – që është një konkurrent direkt i ChatGPT. Gjyqi pritet të zgjasë tre javë, dhe kompanitë e tjera të mëdha të teknologjisë si Meta, Amazon dhe Apple po e ndjekin me vëmendje, pasi edhe ato përballen me procese të ngjashme nga DOJ.
OpenAI dhe një rrjet i mundshëm social
Ndërkohë, raportime të fundit tregojnë se OpenAI po eksploron krijimin e një rrjeti të ri social. Sipas The Verge, projekti është ende në faza të hershme, por CEO i kompanisë, Sam Altman, ka nisur konsultimet për një alternativë ndaj platformës X (ish-Twitter). Altman dhe Elon Musk, i cili drejton X, dikur kanë qenë partnerë biznesi, por marrëdhënia e tyre përfundoi me një konflikt të ashpër për drejtimin e OpenAI. X tashmë ka integruar një mjet të vetin AI të quajtur Grok, që përdoret brenda platformës së saj sociale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
