Çelik Nimani, folës në konferencën Infocom X, tregon faktorin e suksesit të kompanive teknologjike » Business Magazine Albania – Media Dixhitale dedikuar Sipërmarrjes
Përditësuar së fundmi: 26/04/2019

Çelik Nimani, folës në konferencën Infocom X, tregon faktorin e suksesit të kompanive teknologjike

Share
nga Anerola Torollari
Pri 26, 2019
Studied at Faculty of Science, Content Editor Biznesi at Business Magazine
lexo me teper >

Çelik Nimani nga Kosova u ngjit në skenën e Infocom X, për të prezantuar botën e software. Ai është partner dhe CEO i kompanisë Frakton Kosova, një kompani softuerike e specializuar për ndërtimin e software-ve, bashkë-themelues i WebEye, një aplikacion për gjurmimin e produkteve dixhitale dhe bashkë-themelues i Buzzin, një platformë e-commerce për stilistët në Ballkan. Që prej vitit 2011 ai mentoron dhe ndihmon themeluesit e startup-ve të reja në të gjithë Europën Lindore, nëpërmjet kontributit si lehtësues dhe organizator vullnetar për Startup Weekend/ UP Global.

Në një intervistë për BusinessMag, i pyetur se çfarë duhet të bëjnë kompanitë teknologjike që t’u përshtaten të gjitha ndryshimeve që po ndodhin në këtë fushë, ai thotë se, “kultura brenda kompanisë është faktori më i rëndësishëm që lidhet me suksesin dhe tërheqjen e zhvilluesve më të mirë të software”.

Lexon: Infocom X: Teknologjia, bazë zhvillimi për çdo sektor

“Faktorët që bëjnë dallimin mes një kompanie të sukesshme dhe një kompanie që mund të dështojë është kultura e kompanisë. Kompanitë duhet të investojnë në kulturën e tyre, pasi ky është faktori numër një që bën dallimin dhe tërheq vëmendjen e zhvilluesve.  Një faktor i dytë është prania e projekteve sfiduese, pasi kjo i shtyn zhvilluesit të avancojnë si profesionalisht ashtu edhe personalisht. Faktorë të tjerë janë zhvillimi i produkteve inovative in-house, si dhe fleksibiliteti i orëve të punës”, shprehet Çeliku.

Këto janë faktorët që përcaktojnë suksesin e një kompanie për vitet e ardhshme, sipas tij. “Kompanitë që nuk investojnë në kulturën brenda tyre, që nuk investojnë në këto sfida brenda ekipit kanë për ta pasur të vështirë të mbajnë talentin për një kohë të gjatë, pasi do të kërkojnë një kompani tjetër, e cila u ofron kushtet e një kulture më të mirë që ka qoftë dhe detajet më të vogla, si lojëra argëtuese (ping-pong, bowling night, football games). Në ditët e sotme zhvilluesit po u kushtojnë shumë rëndësi këtyre faktorëve dhe duan të ndjekin karrierën e tyre në një ambient që i ofron ato”.

Mesa duket tashmë paga nuk po shihet si faktor përcaktues për të qëndruar në një kompani. Paga në bazë të kërkimit të tregun renditet e 6-ta, si faktor për të ndryshuar punë.

Ai thotë se në kompaninë e tij i aplikon të gjitha këto, pasi është një mjedis dinamik dhe ka një numër të madh kompanish IT që janë hapur dhe ekziston një konkurrencë e lartë lokale.

Krahas kësaj, konkurrenca më e madhe është prej kompanive globale, si në Austri, Gjermani, Zvicër, Amerikë, të cilat targetojnë zhvilluesit që janë zhvilluar dhe trajnuar prej kompanive lokale. Kompanitë e huaja janë një hap përpara në kulturën, trajnimet, sfidat. Për këtë arsye thotë Çeliku, “duhet të investojmë që të jemi konkurrues edhe në nivel global”.

Një çështje tjetër që vuri në dukje ai gjatë prezantimit, është kërkesa më e madhe se oferta për zhvillues, si në Kosovë ashtu edhe në Shqipëri. Shkak për këtë, ndoshta është mungesa e shpalosjes së programeve të tilla në shkollat e mesme apo ato fillore. Megjithatë, si në Kosovë dhe në Shqipëri ka filluar të vihet re njëfarë ndryshimi pasi disa shkolla private kanë filluar të trajnojnë fëmijë në gjuhë programuese dhe interesohen ta bëjnë këtë vetëm se ka të ardhme në programim. Edhe pse këta persona po kalojnë në shkenca kompjuterike, numri i tyre është i pamjaftueshëm. Madje tani kanë filluar edhe disa akademi që të targetojnë këta të rinj dhe të bëjnë komunikimin e tyre.

Lexoni: Çelik Nimani, rrugëtimi i një Sipërmarrësi në ICT

“Nëse nisemi prej vetes”, thotë Çeliku, “nëse në shkollë fillore do të na kishte komunikuar dikush që shkencat kompjuterike, programimi shërben për të zhvilluar një lojë apo aplikacion tëndin, ne do të kishim zgjedhur një karrierë tjetër”.

Ai këshillon që kompanitë e teknologjisë të ftojnë fëmijët në ambientet e tyre për t’u treguar që e ardhmja dhe çdo profesion tashmë është e lidhur me software dhe natyrisht duhet të bëhet një lloj presioni tek institucionet arsimore si në Shqipëri ashtu edhe në Kosovë, për të trajnuar dhe edukuar më shumë brezat që po vijnë. Përderisa nuk po merret arsimi me këtë pjesë, kompanitë janë duke ofruar trajnime vetë, duke zhvilluar in-house training, ku edukojnë ekipin me aftësitë për punën. Pra, për vendet e reja të punës që kanë në kompani.