Brikena Muharremi, avokatja në Britaninë e Madhe që po fuqizon rrjetin e profesionistëve shqiptarë
Përditësuar së fundmi: 29/05/2019

Brikena Muharremi, avokatja në Britaninë e Madhe që po fuqizon rrjetin e profesionistëve shqiptarë

Share
nga Ornela Trupja
Maj 29, 2019

Shqipëria ndër vite i ka “dhuruar” botës njërëz të suksesshëm, të cilët kanë kontribuar në vendin ku jetojnë, e njëherazi edhe kanë ngritur lart emrin e kombit tonë. Një ndër to është edhe Brikena Muharremi, e cila është e para avokate shqiptare e liçensuar në Britaninë e Madhe. Por, si arriti Brikena ta realizojë këtë?

Për BusinessMag.al ajo tregon të gjitha hapat që ndoqi për të arritur këtë sukses e për të realizuar ëndrrat e saj. U largua nga Kosova kur ishte 16 vjeç, për të studiuar në shkollat e Britanisë, e tashmë prej 23 vitesh është vendosur në Londër, ku po pasuron karrierën e saj prej avokateje. Duke qenë se në atë kohë shkollat në Kosovë ishin mbyllur dhe mësimi zhvillohej nëpër shtëpi, vendosi të largohet për të studiuar drejtësi në Londër. Ajo ishte e vetmja studente në fakultetin juridik, e vlerësuar me notën më të lartë First Class. Ky ishte një sukses që i hapi rrugën në avokati.

Me pasionin e madh për letërsinë dhe me dëshirën e madhe për t’i shërbyer drejtësisë, vendosi të fokusohet tek e dyta. “Shteti britanik respekton të drejtat e popullit të tij dhe të gjithë të barabartë para ligjit”, – thotë ajo. Madje e thekson këtë frazë si nxitjen për të ushtruar profesionin e saj në Britani.

Brikena Muharremi

Aftësia e saj në avokati është vlerësuar nga qeveria shqiptare, e cila e ka vlerësuar në Samitin e Dytë të Diasporës si Ambasadore e Kombit dhe është përzgjedhur të jetë pjesë e Këshillit Koordinues për Diasporën.

“Më janë dhënë dy bursa nga dy institucione të njohura për kursin e specializimit dhe më vonë kam përfunduar trajnimin pranë një firme avokatie ndërkombëtare. Pas kësaj u liçensova”, thotë ajo.

Por përtej asaj që ajo njihet si avokatja e parë shqiptare e liçensuar më Britani, ajo ka themeluar edhe shoqatën e Avokatëve Shqiptaro-Britanikë. Kjo shoqatë është themeluar para 3 tre vitesh dhe ajo udhëheq bordin e përbërë nga shtatë avokatë.

Numri i avokatëve shqiptarë në Angli është në rritje e sipër, sipas saj. Kjo është pozitive për një vend që ka shumë emigrantë atje. Kjo ka sjellë kërkesa nga komuniteti atje për avokatë shqipfolës, e deri te kërkesat nga studentët për udhëzime dhe këshilla rreth avokatisë. Për këtë iniciativë ata janë ndihmuar edhe nga disa avokatët më me emër të Britanisë.

Cili është qëllimi i kësaj shoqate?
Sipas avokates Brikena Muarremi shoqata synon:

  • Promovimin e bashkëpunimit mes avokatëve që punojnë në Angli, Kosovë dhe Shqipëri
  • Avancimin e diturisë në fushën e drejtësisë
  • Përkrahjen e gjeneratave të ardhshme të avokatëve
  • Promovimin e sundimit të ligjit dhe qasjes në drejtësi

E pyetur se çfarë do të dëshironte të ndryshonte në atdhe ajo shprehet se janë shumë gjëra, por “urgjentisht” do të fokusohej në dy pika kyçe, forcimi i sundimit të ligjit dhe lidhja më e fortë me diasporën shqiptare, me qëllim investimin në atdhe.

Çelësi i suksesit për Brikenën janë: vizioni i qartë, puna serioze, mosdorëzimi dhe besimi në vetvete.