2 nëntori ishte një ditë e jashtëzakonshme, që nisi me një mot të egërsuar, por aspak stepës për teknofilët. Për të shtatin vit radhazi, AllWeb bëri bashkë profesionistë të Ballkanit dhe jo vetëm. Kjo konferencë ngjiti mbi podium sipërmarrës të industrive të ndryshme, të gjithë me diçka për të treguar dhe ndarë. Ndryshe nga çdo herë tjetër, vëmendja u drejtua për nga forca shtytëse e Inteligjencës Artificiale dhe shtrirja e saj e gjerë. Pati shembuj argëtues, emocionues, konkretë dhe mbi të gjitha mjaft informues për tendencat e fundit në AI – të pikasura thuajse në çdo fushë të jetës.
CEO dhe themeluesi i Vatrës, Gerton Bejo, u ndal gjatë mbi forcën e të menduarit, aty ku praktikisht fillon dhe mbaron gjithçka. Inteligjenca Artificiale, sipas tij, duhet parë në të vërtetë si një penel telajoje, laps i mprehur ose një mouse. Pasi, duket se ngërçi i parë dhe më i vështirë për të tejkaluar është pikërisht qasja ndaj saj. “Për të patur një të ardhme, agjensitë e marketingut dhe çdo biznes tjetër duhet të përqafojnë, mësojnë dhe përvetësojnë AI, mënyrën se si të dhënat përkthehen në mesazhe vizuale dhe komunikuese”, – tha Z.Bejo.
Ai preku një tjetër kënd, atë të të menduarit shkurt, pa marrë parasysh pasojat. Kapitali njerëzor me atë çka ofron – përfshirë kreativitetin, njohuritë apo aftësitë – është një nga komponentët më të vlefshëm në industrinë krijuese dhe më gjerë, nga e cila nuk mund të hiqet dorë lehtësisht, vetëm e vetëm sepse Inteligjenca Artificiale premton mbulim të thjeshtë dhe të shpejtë pune. Ulja e çmimit tek produkti i ofruar, sipas Z.Bejo, përkthehet në të kundërt fatkeqësisht. Kështu, sipërmarrësi jo vetëm që heq dorë nga vlerësimi i skuadrës së punës, por ul fitimin e kompanisë së tij dhe rrjedhimisht krijohet një efekt zinxhir që s’premton veçse klimë të zymtë.
“Drejtuesit duhet të shfrytëzojnë në formë të mençur përfitimet që AI i ofron industrive të ndryshme në raportin kosto-shpenzim. Ata nuk duhet ta shohin si një alternativë fantastike për të kursyer, por si një mundësi që litari i çdo sipërmarrjeje të forcohet dhe të jetë i lidhur me një spirancë. Ndryshe nga dikur, kur tërhiqej detyrimisht nga një grusht njerëzish”, – u shpreh CEO dhe themeluesi i Vatrës, duke shtuar se Inteligjenca Artificiale thjesht po përballet me litarin, jo me nevojën e personave për ta mbajtur.
Agjencitë e së ardhmes, vijoi Z.Bejo, kanë filluar tashmë ta ndiejnë luftën e KPI. “Pritshmëritë rriten dita ditës dhe kjo nuk është vetëm një përballje me vetveten. Është edhe më të tjerë, të ngjashëm me ty, por edhe me vetë klientin. Kësisoj, ndihet nevoja për aftësi, njohuri dhe arritje të reja…Me fjalë të tjera, për t’u bërë shtëpi gjithëpërfshirëse – me produkte dhe shërbime nga më të larmishmet.”
Kjo panoramikë, sipas tij, po i shtyn agjencitë largpamëse drejt AI pa e menduar dy herë. “Agjencitë që mund t’i përshtaten ndryshimeve të kohës, ndërsa s’reshtin së ofruari për klientët shërbime cilësore dhe efektive marketingu, e kanë padyshim të garantuar suksesin”, – kështu e përfundoi fjalën e tij Z.Bejo.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English