Bashkimi Europian ka ndarë më shumë se 14 miliardë euro për reformat e sponsorizuara nga unioni në Ballkanin Perëndimor. Negociatorët e Parlamentit Europian dhe Këshillit të Europës kanë arritur së fundmi një marrëveshje për fondet që do jepen vendeve të rajonit gjatë periudhës 2021-2027.
Instrumenti për Ndihmën e vendeve aspirantë dhe kandidate Para-Anëtarësimit (IPA III), do të ketë një buxhet prej 14.2 miliardë eurosh dhe do të mbështesë zbatimin e reformave të kërkuara nga BE-ja në Shqipëri, Bosnje, Kosovë, Mal të Zi, Maqedoninë e Veriut, Serbi si dhe Turqi.
BE po ashtu do të vendosë të kushte më të forta të financimit dhe kontroll më të fortë për përdorimin e fondeve. Qëllimi i kësaj paketë është të ndihmojë vendet kandidatë të plotësojnë kushtet e lidhura me demokracinë, të drejtat e njeriut dhe sundimin e ligjit. Por BE ka parashikuar pezullimin e ndihmës në rast regresi në reformat demokratike.
Sipas BE-së, Fondet e “IPA III” do të ndihmojnë po ashtu vendet si Shqipëria në luftën kundër keqinformimi dhe ndryshimeve klimatike, mbrojtjen e mjedisit, të drejtat e njeriut dhe barazinë gjinore. Ai parashikon gjithashtu përmirësimin e koordinimit midis donatorëve dhe forcimin e proceseve të konsultimit me organizatat e shoqërisë civile dhe autoritetet lokale dhe rajonale.
Kryetari i Komitetit të Punëve të Jashtme, David McAllister tha se kjo marrëveshje e shumëpritur politike është një lajm i shkëlqyeshëm për vendet e Ballkanit Perëndimor dhe Bashkimin Evropian. “Ajo hap rrugën për një qeverisje më të mirë, për më shumë koherencë dhe transparencë në financimin e jashtëm dhe është një pikë kritike në politikën tonë të zgjerimit, me synimin e rikuperimit nga pandemia.”
Eurodeputetja kroate Zheljana Zovko tha se marrëveshja siguron financimin e vazhdueshëm për politikën e zgjerimit. “Ky fond ka potencialin të lehtësojë reformat demokratike në vendet e rajonit dhe t’i sjellë ato më pranë BE-së, përmes një plani ambicioz ekonomik dhe investimesh dhe një axhende të gjelbër për Ballkanin Perëndimor”, thotë ajo.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
