Një kompani holandeze thotë se ka zhvilluar një pajisje që përdor inteligjencën artificiale (AI) për të regjistruar dhe vizualizuar ëndrrat. Quhet Dream Recorder, dhe vjen nga Modem Works, një “think tank” dhe studio dizajni me bazë në Amsterdam, e cila e përshkruan pajisjen si një zgjidhje “DIY – Do It Yourself” (Bëje vetë) për të krijuar pamje nga ajo që keni parë në gjumë.
Sipas përshkrimit në faqen zyrtare të projektit:
“Zgjohuni, tregoni me zë të lartë ëndrrën tuaj… dhe shikojeni të shndërrohet në një peizazh ëndrrash, me estetikën që dëshironi.”
Si funksionon?
Përdoruesit udhëzohen të shkarkojnë kodin burimor të hapur, të mbledhin pajisjet e nevojshme dhe të printojnë në 3D guaskën e jashtme të pajisjes. Më pas, ata mund ta montojnë vetë Dream Recorder-in në shtëpi.
Me dy trokitje të shkurtra, nis regjistrimi i zërit të përdoruesit që rrëfen ëndrrën. Pasi përfundon rrëfimi, AI gjeneron imazhet e ëndrrës në “rezolucion ultra të ulët”, të ruajtura në një procesor të vogël me kapacitet 8 GB. Pajisja mund të ruajë deri në shtatë ëndrra dhe t’i rikthejë ato me një trokitje të vetme.
Lexo edhe: Studimi i fundit: Inteligjenca Artificiale mund të marrë vendime të rrezikshme për vetëmbrojtje!
Kompania ka publikuar gjithashtu listën e pjesëve që nevojiten – përfshirë një ekran HDMI, një mikrofon USB, një kartë microSD dhe një procesor të vogël – të gjitha me një kosto totale rreth 285 euro. Kodi i projektit ndodhet në platformën GitHub, ku zhvilluesit e softuerëve ndajnë projektet e tyre.
AI që krijon ëndrra, por me kosto minimale
Për të gjeneruar pamjet e ëndrrave, përdoruesit duhet të paguajnë për përdorimin e API-ve nga OpenAI dhe LumaLabs – kompani që ofrojnë shërbime të avancuara për krijimin e imazheve dhe videove me AI. Kostoja për gjenerimin e një ëndrre vlerësohet të jetë më pak se 0.01 deri në 0.14 dollarë, në varësi të cilësisë së imazheve të prodhuara.
Jo përpjekja e parë
Kjo nuk është përpjekja e parë për të “lexuar” apo “vizualizuar” ëndrrat me ndihmën e teknologjisë. Në vitin 2023, ATR Computational Neuroscience Laboratories në Japoni zhvilluan një sistem të bazuar në skanime MRI, që pretendonte të vizualizonte ëndrrat me një saktësi prej 60%. Po ashtu, një studim paraprak i publikuar nga Universiteti Kombëtar i Singaporit dhe Universiteti Kinez i Hong Kongut mbërriti në të njëjtin përfundim.
Ndërsa teknologjia përpiqet të hyjë edhe në zonën më intime të përvojës njerëzore – ëndrrat – mbetet për t’u parë se sa e besueshme, e sigurt dhe etikisht e pranueshme do të jetë një botë ku as gjumi nuk është më një vend i paprekur nga inteligjenca artificiale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English