Infrastruktura shqiptare ka nevojë për 1.2 miliardë euro për të arritur standardet e Bashkimit Evropian. Kështu u shpreh ministri i Transporteve dhe Infrastrukturës Edmond Haxhinasto, gjatë takimit të ministrave të rajonit.
“Është një sfidë e madhe për angazhimet tona buxhetore dhe padiskutim është domosdoshmëri që të shikohen edhe mënyra alternative për t’i plotësuar ato”, u shpreh ai, ndërsa shtoi se një sektor i rëndësishëm është edhe zhvillimi i hekurudhës.
“Korridori 8 ka një rëndësi strategjike për ne, lidhja me Maqedoninë në mënyrë të veçantë, prandaj do të vazhdojmë për planifikojmë dhe alokojmë resurse për realizimin e tij. Në planet tona për hekurudhën është edhe lidhja me Greqinë”, shtoi ministri.
Kreu i infrastrukturës tha se vëmendje e veçantë ne dy vitet e fundit i është kushtuar mirëmbajtjes dhe sigurisë rrugore:
“Kemi llogaritur një diferencë prej 80 mln dollarësh nevojë për ta sjellë rrjetin tonë të transportit në gjendje të mirëmbajtjes rutinë”.
Observatori i Transportit për Evropën Juglindore (SEETO) është një organizatë rajonale që mbështet transportin rajonal në bashkëpunim me 6 shtete të rajonit, si Shqipëria, Bosnje Hercegovina, Maqedonia, Mali i Zi, Serbia, Kosova dhe Komisioni Evropian. Serbia nuk u përfaqësua në këtë tryezë në rang ministri por me një asistent. Diskutimet u përqendruan në kordinimin e nismave për realizimin e projekteve rajonale.
/Shekulli/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
