Problemet në zbatimin e ligjit të Australisë që ndalon përdorimin e rrjeteve sociale për personat nën 16 vjeç nuk lidhen me mungesën e teknologjisë, por me mënyrën se si ajo po përdoret nga vetë platformat, sipas një organizate që përfaqëson ofruesit e teknologjive të verifikimit të moshës.
Ky reagim vjen në një moment kur autoritetet australiane po rrisin presionin ndaj disa prej kompanive më të mëdha të teknologjisë në botë, si Meta Platforms, Alphabet Inc. dhe Snap Inc., për zbatimin e ligjit që hyri në fuqi në dhjetor dhe që konsiderohet si i pari i këtij lloji në nivel global. Sipas Iain Corby, drejtor ekzekutiv i Age Verification Providers Association (AVPA), problemi nuk qëndron tek aftësitë teknologjike, por tek aplikimi i tyre në praktikë. Ai thekson se mangësitë e para të evidentuara tregojnë nevojën për kërkesa më të forta dhe për një zbatim më rigoroz të rregullave, dhe jo për mungesë funksionaliteti të teknologjisë së verifikimit të moshës.
Komisioneri australian për sigurinë online po heton platformat si Facebook, Instagram, YouTube, TikTok dhe Snapchat për shkelje të mundshme të ligjit. Kompanitë përballen me gjoba deri në 49.5 milionë dollarë australianë për çdo shkelje, ndërsa qeveria ka bërë të ditur se po mbledh prova për të ndërmarrë veprime ligjore në Gjykatën Federale nëse situata nuk përmirësohet.
Lexo edhe: A mund të të kthejë një “digital twin” në një superpunonjës?
Sipas raportit të AVPA, faza fillestare e zbatimit ka treguar se teknologjitë për verifikimin e moshës funksionojnë në shkallë të gjerë dhe me saktësi, por platformat nuk i zbatojnë ato në mënyrë të qëndrueshme, veçanërisht në momente kyçe si krijimi i llogarive të reja. Ky konstatim bie ndesh me pretendimet e vetë kompanive të rrjeteve sociale, të cilat shpesh argumentojnë se teknologjia aktuale nuk është e mjaftueshme për të ndaluar përdoruesit nën moshë.
Të dhënat e rregullatorit australian tregojnë se miliona llogari të dyshuara si nën moshë janë hequr që nga hyrja në fuqi e ligjit. Megjithatë, mbeten probleme të vazhdueshme, si mungesa e verifikimit të moshës gjatë regjistrimit, mundësia që përdoruesit të provojnë disa herë derisa të kalojnë kontrollin dhe varësia e madhe nga vetëdeklarimi i moshës.
Raporti nënvizon gjithashtu se rreziqet kryesore lidhen me përdorimin e modeleve të brendshme që parashikojnë moshën bazuar në aktivitetin online, si dhe me mungesën e verifikimeve të përsëritura për llogaritë ekzistuese. Sipas AVPA, testimet e pavarura dhe zbatimi i hershëm në praktikë tregojnë se këto dobësi burojnë kryesisht nga mënyra si platformat zgjedhin të përdorin teknologjinë, dhe jo nga kufizimet e saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
