Meta ka prezantuar një model të ri të Inteligjencës Artificiale që mund të parashikojë se si truri i njeriut reagon ndaj imazheve, tingujve dhe fjalëve. Në testime, ky model ka arritur të përputhet shpesh me reagimin “mesatar” të trurit më mirë sesa matjet reale të një individi të vetëm.
Studimi i trurit zakonisht kërkon eksperimente të reja dhe skanime për çdo rast të veçantë, gjë që e bën kërkimin në neuroshkencë të ngadaltë dhe të kushtueshëm. Studiuesit e inteligjencës artificiale në laboratorin FAIR të Meta-s synojnë ta kapërcejnë këtë pengesë duke përdorur një model që parashikon aktivitetin e trurit, në vend që ta masë atë drejtpërdrejt.
Modeli quhet TRIBE v2 dhe është trajnuar me më shumë se 1,000 orë të dhëna nga skanime fMRI, të mbledhura nga 720 persona. Kjo teknologji (fMRI) mat aktivitetin e trurit në mënyrë indirekte, duke ndjekur ndryshimet në qarkullimin e gjakut dhe nivelin e oksigjenit. Duke përdorur këtë bazë të dhënash, TRIBE v2 synon të parashikojë reagimin e trurit ndaj çdo stimuli, qoftë vizual, zanor apo gjuhësor.
Për të funksionuar, modeli përdor tre lloje inputesh: video, audio dhe tekst. Secili prej tyre përpunohet fillimisht nga modele të tjera të avancuara të Meta-s. Teksti analizohet nga Llama 3.2, audio nga Wav2Vec-Bert-2.0 dhe video nga Video-JEPA-2. Këto modele e shndërrojnë informacionin në forma të kuptueshme për AI-n, duke kapur elementet kryesore të asaj që shohim, dëgjojmë apo lexojmë.
Lexo edhe: Rreziqet kuantike po afrohen, Google paralajmëron për kërcënime ndaj sigurisë digjitale
Rezultati është një sistem që mund të lidhë përmbajtjen me reagimin e mundshëm të trurit, duke krijuar një “hartë” të mënyrës se si aktivizohen zona të ndryshme të tij në varësi të stimujve.
Një nga aspektet më interesante është se parashikimet e modelit rezultojnë shpesh më të pastra dhe me më pak “zhurmë” sesa vetë skanimet e trurit, të cilat mund të ndikohen nga shumë faktorë të jashtëm. Në një farë mënyre, modeli arrin të rikrijojë në kompjuter dekada kërkimesh laboratorike.
Megjithatë, ky model mbetet një “vëzhgues pasiv”. Ai mund të parashikojë reagime, por nuk mund të ndërhyjë apo të kontrollojë aktivitetin e trurit. Gjithashtu, ai bazohet në të dhëna mesatare dhe nuk mund të kapë plotësisht kompleksitetin unik të çdo individi.
Ky zhvillim hap rrugë të reja për kërkimin shkencor, duke e bërë më të shpejtë dhe më të aksesueshëm studimin e trurit. Në të ardhmen, mund të ndihmojë në fusha si mjekësia, psikologjia, marketingu apo edhe krijimi i përmbajtjeve më të personalizuara.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
