Mjeti hapësinor Starship, që SpaceX po zhvillon për të dërguar astronautë në Hënë në kuadër të programit Artemis të NASA-s, mund të përballet me vonesa të tjera, sipas një raporti të ri të Zyrës së Inspektorit të Përgjithshëm të NASA-s.
Fillimisht, ulja në Hënë ishte planifikuar për 2027, por tashmë është shtyrë për 2028, ndërsa raporti paralajmëron se edhe ky afat mund të jetë i vështirë për t’u arritur për shkak të sfidave teknike dhe testimeve që ende nuk janë përfunduar.
Lexo edhe: Shqiptari i Microsoft vjen në PowerToHR për të treguar çfarë i pret bizneset!
Një nga pengesat kryesore është furnizimi me karburant i Starship në orbitë, një teknologji që nuk është realizuar kurrë më parë në këtë formë dhe që është thelbësore për udhëtimin drejt Hënës. Raporti gjithashtu thekson se NASA aktualisht nuk ka një plan shpëtimi për astronautët, në rast se një problem serioz ndodh gjatë misionit në hapësirë ose në sipërfaqen e Hënës.
Ndërkohë, edhe kompania rivale Blue Origin përballet me vonesa në zhvillimin e mjetit të saj të uljes në Hënë. NASA po planifikon një mision testues në vitin 2027, ku astronautët do të praktikojnë bashkimin me mjetet e uljes në orbitë, për të ulur rrezikun përpara misionit final drejt Hënës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
