Chatbot-et me inteligjencë artificiale (AI) japin këshilla mjekësore të pasakta dhe të papërshtatshme, që mund të paraqesin rreziqe për përdoruesit, sipas një studimi nga Universiteti i Oksfordit.
Studimi zbuloi se njerëzit që përdorin AI për këshilla shëndetësore marrin një përzierje përgjigjesh të mira dhe të këqija, gjë që e bën të vështirë të dallosh se cilat këshilla duhet të ndiqen.Në nëntor 2025, një sondazh i Mental Health UK tregoi se më shumë se një në tre banorë të Mbretërisë së Bashkuar përdorin tashmë AI për të mbështetur shëndetin mendor ose mirëqenien e tyre.Dr. Rebecca Payne, udhëheqëse e studimit, tha se mund të jetë “e rrezikshme” që njerëzit të pyesin chatbot-et për simptomat e tyre.
Si u zhvillua studimi
Studiuesit u dhanë 1,300 personave skenarë të ndryshëm, si për shembull dhimbje të forta koke ose një nënë e re që ndjehej vazhdimisht e lodhur. Pjesëmarrësit u ndanë në dy grupe, ku njëri grup përdori AI-në për të kuptuar se çfarë mund të kenë dhe për të vendosur çfarë veprimi të merrnin më pas. Studiuesit pastaj vlerësuan nëse pjesëmarrësit identifikuan saktë problemin dhe nëse duhej të shkonin tek mjeku i familjes ose në urgjencë. Rezultatet treguan se njerëzit që përdorën AI shpesh nuk dinin çfarë të pyesnin dhe merrnin përgjigje të ndryshme në varësi të mënyrës se si e formulonin pyetjen. Chatbot-i jepte një përzierje informacioni, dhe pjesëmarrësit e kishin të vështirë të dallonin çfarë ishte e dobishme dhe çfarë jo.
Dr. Adam Mahdi, autor kryesor i studimit, tha për BBC-në se edhe pse AI mund të japë informacion mjekësor, njerëzit “vështirë se marrin këshilla të dobishme prej tij”. “Njerëzit japin informacion gradualisht,” tha ai.“Shpesh lënë gjëra jashtë, nuk përmendin gjithçka. Pra, në studimin tonë, kur AI-ja listonte tre gjendje të mundshme, njerëzit mbeteshin të zgjidhnin se cila prej tyre mund të përshtatej. Këtu është momenti kur gjërat mund të shkojnë keq.”
Autori kryesor Andrew Bean shtoi se analiza tregon se ndërveprimi me njerëzit paraqet një sfidë “edhe për modelet më të avancuara të AI-së”. “Shpresojmë që ky punim të kontribuojë në zhvillimin e sistemeve më të sigurta dhe më të dobishme me AI,” tha ai.
Dr. Amber W. Childs, profesoreshë e asociuar e psikiatrisë në Yale School of Medicine, tha se pasi chatbot-et trajnohen mbi praktikat dhe të dhënat mjekësore aktuale, ato gjithashtu mund të përsërisin paragjykime të “ngulitura” në praktikën mjekësore për dekada. “Një chatbot është aq i mirë sa janë diagnostikuesit e përvojës së gjatë, që nuk janë të përsosur as ata,” tha ajo.
Ndërkohë, Dr. Bertalan Meskó, redaktor i The Medical Futurist, që parashikon tendencat teknologjike në shëndetësi, tha se po vijnë zhvillime të reja në këtë fushë. Ai përmendi se dy zhvillues kryesorë të AI-së, OpenAI dhe Anthropic, kanë nxjerrë versione të dedikuara për shëndetin e chatbot-eve, të cilat sipas tij “do të japin patjetër rezultate të ndryshme në një studim të ngjashëm”. Qëllimi, sipas tij, duhet të jetë “përmirësimi i vazhdueshëm” i teknologjisë, veçanërisht versionet e lidhura me shëndetin, duke pasur rregullore të qarta kombëtare, kufij ligjorë dhe udhëzime mjekësore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
