Facebook do të tarifojë përdoruesit për postimin e linkeve

Facebook pritet të nisë tarifimin e përdoruesve për postimin e linkeve në rrjetin social, një lëvizje që rrezikon të ulë edhe më tej trafikun drejt mediave online, bizneseve dhe blogerëve.

Platforma po teston kufizimin e numrit të linkeve që përdoruesit mund të ndajnë në vetëm dy në muaj, përveç rasteve kur ata paguajnë £11.99 për abonimin “Meta Verified”.

Në pamje ekrani të shpërndara nga përdoruesit në rrjete sociale, Facebook paralajmëron: “Duke filluar nga 16 dhjetori, disa profile në Facebook pa Meta Verified do të kufizohen në ndarjen e dy postimeve organike në muaj. Abonohuni në Meta Verified për të ndarë më shumë linke në Facebook.”

Lexo edhe: KUJDES NGA SULMET PHISHING NË WHATSAPP!

Një zëdhënës i Meta-s u shpreh se: “Kjo është një provë e kufizuar për të kuptuar nëse mundësia për të publikuar një volum më të madh postimesh me linke sjell vlerë shtesë për abonentët e Meta Verified.”

Aktualisht, mediat online nuk po kërkohen të paguajnë tarifën e abonimit, por ky vendim mund të ndikojë negativisht në trafikun që ato marrin nga rrjetet sociale, duke kufizuar ndarjen e linkeve nga përdoruesit e zakonshëm. Botuesit e vegjël, blogerët dhe brandet tashmë po përballen me vështirësi të reja, sidomos pas ndryshimeve në mjetet e kërkimit të Google, ku përmbledhjet e gjeneruara nga inteligjenca artificiale kanë reduktuar klikimet drejt faqeve origjinale.

Dikur, markat mediatike mbështeteshin fort te rrjetet sociale për të gjeneruar vizita në faqet e tyre, si përmes postimeve zyrtare ashtu edhe përmes shpërndarjeve nga lexuesit.

Sot, Facebook, X dhe LinkedIn po shmangin gjithnjë e më shumë trafikun drejt mediave, duke ulur dukshmërinë e linkeve të jashtme me synimin për t’i mbajtur përdoruesit brenda aplikacionit. Në vend të tyre, këto platforma po promovojnë video dhe postime më të gjata direkte nga përdoruesit.