Zëvendësministri i Brendshëm, Julian Hodaj, ka deklaruar se Shqipëria ka nisur një proces të madh investimesh që kanë për synim mbrojtjen kibernetike dhe ku kërkohet ekspertizë e dorës së parë, ndaj dhe ekspertiza e lartë evropiane është më se e mirëpritur.
Hodaj – në mbledhjen e Asamblesë së Shoqatës së Shefave të Policisë të Evropës Juglindore (SEPCA) – ka vlerësuar se ky “është një rast i volitshëm për të shkëmbyer përvojat dhe për të ndarë idetë lidhur me mënyrat efikase të luftës kundër fenomeneve kriminale”.
“Besoj se angazhimi i secilit prej jush për këtë shoqatë ka një synim parësor: afrimin dhe forcimin e lidhjeve të bashkëpunimit midis pjesëtarëve të saj”.
Sipas tij, tri janë çështjet kryesore në fokus të këtij takimi: emigracioni i paligjshëm dhe trafiku i qenieve njerëzore, lufta kundër krimit të organizuar dhe lufta kundër krimit kibernetik.
Ai po ashtu ka vlerësuar se ky bashkëpunim i ka të gjitha mundësitë që të avancojë falë natyrës së marrëdhënieve shumë të mira që kanë në nivel politik shtetet tona.
“Besoj fort se vendet tona fitojnë më shumë siguri kur agjencitë ligjzbatuese veprojnë të sinkronizuar, sidomos në strukturat policore. Në kuadër të luftës kundër krimit ndërkufitar apo kibernetik mund të përfitojmë ndjeshëm nëse koordinojmë forcat dhe burimet tona njerëzore dhe teknologjike”, ka thënë ai.
Hodaj ka thënë se bashkërendimi i aksioneve dhe puna e përbashkët e ekipeve rrisin kohezionin dhe efikasitetin e përpjekjeve për t’u shërbyer qytetarëve në vendet respektive dhe rrjedhimisht në gjithë rajonin.
“Tashmë jemi në një fazë ku kufijtë po bëhen gjithnjë e më shumë fluidë, ndërsa rreziqet hibride sa vijnë e shtohen. Ndërkaq krimi i organizuar ka aftësinë për t’u kamufluar, të përshtatet dhe të maskohet pa pasur nevojë për pasaportë apo shtet origjine”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
