“Shtatëshja Madhështore” e gjigandëve të teknologjisë fitoi më shumë se 1.5 trilionë dollarë në vlerë tregu të mërkurën, pasi Presidenti Trump vendosi të pezullojë për 90 ditë tarifat e reja të gjera, duke lehtësuar presionin mbi kompanitë teknologjike që kishin pësuar rënie të ndjeshme në sesionet e fundit.
Megjithëse këto fitime nuk mjaftuan për të rikuperuar plotësisht humbjen prej 3.4 trilionë dollarësh që këto kompani kanë pësuar që nga kulmi i tyre në fund të vitit 2024 – me rreth 2 trilionë humbje vetëm gjatë javës së fundit pas vendosjes së tarifave ndaj importeve nga vende si Kina – pauza e tarifave u dha investitorëve arsye për të rikthyer besimin te këto aksione të kushtueshme. Vlerësimet e kompanive kishin arritur nivele të jashtëzakonshme, teksa ato kishin investuar miliarda dollarë për të zhvilluar infrastrukturën e inteligjencës artificiale. “Pauza në tarifa, shpresojmë që t’u japë frymëmarrje CFO-ve dhe COO-ve për të vijuar planet e zgjerimit në AI, të cilat mund të kishin mbetur pezull për shkak të tensioneve tregtare – veçanërisht duke pasur parasysh rrezikun nga tarifat mbi importet e çipave të specializuar dhe pajisjeve nga vende si Tajvani apo Koreja e Jugut,” tha Michael Ashley Schulman, Drejtor Investimesh në Running Point Capital, që ka ekspozim në këto aksione përmes fondeve dhe klientëve familjarë.
Lexo edhe:Opinion/ Të dështuar apo të suksesshëm?! Zgjedhja është e juaja!
“Shtatëshja Madhështore” – Nvidia (gjigandi i çipave për AI), Apple, Tesla, Microsoft, Alphabet, Meta (kompania mëmë e Facebook) dhe Amazon – shënuan rritje të ndjeshme në bursë, me çmimet e aksioneve që u rritën nga 9% deri në 23%, duke nxitur një rikthim të fuqishëm në treg dhe duke çuar Nasdaq-un mbi 12%. Përveç lëkundjes së tregjeve, tarifat kishin ndikuar negativisht edhe në planet e bizneseve për të investuar në mjetet dhe shërbimet e fuqizuara nga AI, të ofruara nga këto kompani teknologjike. Analistët e Wall Street do të ndjekin me vëmendje buxhetet dhe shpenzimet e kompanive, kur ato të raportojnë rezultatet tremujore më vonë këtë muaj. Alphabet rikonfirmoi të mërkurën se do të shpenzojë rreth 75 miliardë dollarë këtë vit për të zgjeruar kapacitetet e qendrave të të dhënave, ndërsa Microsoft njoftoi se është në rrugë të mbarë për të kaluar shifrën prej 80 miliardë dollarësh në investime për ndërtimin e infrastrukturës së saj të qendrave të të dhënave. “Këto investime janë të bazuara si në sinjale të kërkesës afatshkurtër ashtu edhe afatgjatë,” tha Microsoft të martën. Presidenti Trump deklaroi të mërkurën se do të pezullojë për 90 ditë shumicën e tarifave të reja, ndonëse vendosi të rrisë më tej tarifat për importet nga Kina. Ky ndryshim i papritur ndodhi më pak se 24 orë pasi kishin hyrë në fuqi tarifat e reja për dhjetëra partnerë tregtarë. Sipas tij, tarifa për importet kineze do të ngrihet në 125% nga niveli prej 104% që kishte hyrë në fuqi në mesnatë, ndërkohë që do të ulen për vendet e tjera të prekura nga këto tarifa të reja të synuara.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
