Ministrja e Bujqësisë dhe Zhvillimit Rural Frida Krifca, ka theksuar në Asamblenë e Koalicionit të Tregjeve të Vogla për Fermerët, në Romë, se nga bashkëpunimi mes Shqipërisë dhe Italisë synojmë të kemi në të ardhme, produkte të përbashkëta dhe etiketa të përbashkëta.
Ajo mori pjesë në këtë event me ftesë të ministrit italian të Bujqësisë, Francesco Lollobrigida.
Ministrja vuri në dukje se “Italia është është partneri më i rëndësishëm tregtar i Shqipërisë, me një vëllim shkëmbimesh mbi 4 miliardë euro në vitin 2022, ku mbi 10 % e volumit tregtar i përket mallrave bujqësore”.
Krifca tha se “vitet e fundit ne kemi qenë dëshmitarë të një rritjeje të jashtëzakonshme të partneriteteve midis kompanive tona dhe ndërmarrjeve italiane që operojnë në industrinë ushqimore”.
“Ajo që shoh në të ardhmen është bashkëpunimi dhe markat gjithnjë e më shumë të përbashkëta. Shoh produkte të përbashkëta dhe pse jo, etiketa të përbashkëta: “Made in Albania” dhe “Made in Italy”, tha Krifca.
Lexo: Konfindustria: fiskalizimin e tregut të karburanteve, një hap i duhur
Vitin e kaluar kemi eksportuar mbi 500 milionë euro produkte bujqësore, sipas ministres Krifca. Ajo theksoi lehtësimin e procesit të mekanizimit, duke eliminuar të gjitha taksat për shumicën e makinerive të importuara dhe mjetet e transportit.
Ministrja Krifca deklaroi se “për të arritur objektivin tonë prej 1 miliard euro eksporte brenda vitit 2030, nuk mund të anashkalojmë asnjë mundësi për t’u rritur dhe për të bashkëpunuar”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
