Një sondazh i fundit mbi emigracionin mes të rinjve ngre alarmin për rrezikun që i kanoset vendit, nga shkalla e lartë e emigrimit të trurit. Rreth 90% e të rinjve që studiojnë mjekësi, informatikë dhe inxhinieri duan të largohen.
Presidenti i Republikës Ilir Meta ka ngitur shqetësimin e nivelit të lartë të emigracionit mes të rinjve të arsimuar. Pasi u njoh me rezultatet e anketës së zhvilluar me më shumë se 1600 studentë, z.Meta tha se, “rinia ka nevojë për shpresë dhe besim”. Sipas kësaj anketë të prezantuar nga ekspertë të çështjeve demografike, gati 80 % e të rinjve, që studiojnë në Shqipëri duan të largohen. Ndërkohë, 94% e të rinjve që studiojnë jashtë, nuk duan të kthehen.
Ekspertët Ilir Gëdeshi dhe Rusell King prezantuan rezultatet e anketës me 1650 studentë me moshë mesatare 22 vjeç. Sipas z.Gëdeshi, synimi për të emigruar lidhet me përfytyrimin që kanë studentët për të ardhmen e tyre. Nga njëra anë, ai është një pasqyrim i gjendjes reale ekonomike, sociale e politike në Shqipëri dhe, nga ana tjetër, i mundësive potenciale në vendin pritës. “Në një studim tjetër të botuar në 2018, treguesi i emigrimit potencial nga Shqipëria, për grupmoshën 18 deri 40 vjeç, ishte 52%. Por, kurba e tij kulmonte në moshat 27-30 vjeç ( me 71.2% e të anketuarve që duan të emigrojnë) dhe se dëshironin më shumë të emigronin ata që kishin arsim universitar. Tendencat e reja tregojnë se nga Shqipëria synojnë të emigrojnë më shumë të rinjtë dhe më të arsimuarit”.
Kur duan të emigrojnë studentët?! Të dhënat e anketës tregojnë se 7% e studentëve që duan të emigrojnë dëshirojnë të ikin nga Shqipëria para përfundimit të studimeve, 62% menjëherë pas përfundimit të studimeve universitare dhe rreth 27% pas një përvoje pune në Shqipëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto