Qeveria: Investoni kursimet në Bono Thesari

Ministria e Financave dhe institucionet në varësi të saj ftojnë publikun të investojë kursimet në titujt qeveritarë. Instrumentet e borxhit njihen pak, prandaj Financat kanë nisur një fushatë promovimi të letrave me vlerë. Ç’janë Titujt Qeveritarë, cilat janë përfitimet? Titujt qeveritarë janë instrumente borxhi të cilët emetohen dhe garantohen nga Qeveria e Republikës së Shqipërisë. Avantazhet e investimit në këta tituj janë: Normë interesi e përftuar më e lartë se alternativat e tjera të investimit (depozitat bankare); Siguri shumë e lartë; Të tregtueshëm menjëherë në tregun sekondar. Instrumentet e borxhit janë afatshkurtër dhe afatgjatë. Letrat me vlerë që janë afatshkurtra cilësohen ndryshe si Bono Thesari me maturim 3-mujore, 6-mujore, 12-mujore. Instrumentet afatgjatë cilësohen ndryshe si Obligacione me maturim 2-vjeçare, 3-vjeçare, 5-vjeçare, 7-vjeçare, 10- vjeçare.

Bono Thesari

Bonot e thesarit janë instrumente që tregtohen me zbritje. Përfitimi nga investimi në bono thesari llogaritet si diferencë e çmimit të blerjes së bonove së thesarit me vlerën nominale të saj (vlerën e investimit). Në datën e maturimit të bonove të thesarit aplikohet tatimi mbi interesin e përfituar nga investimi. Tatimi është 15%. Ankandet për bonot e thesarit me afat 3-mujore dhe 6-mujore organizohen një herë në muaj, ndërsa për ato 12-mujore organizohen çdo dy javë. Shuma minimale e lejuar për pjesëmarrje në ankandet e bonove te thesarit në lekë është 300 mijë lekë, ndërsa për ankandet e bonove të thesarit në valutë është dy mijë Euro/USD.

Obligacione

Obligacionet tregtohen me “par value”. Kjo do të thotë që çmimi i blerjes së tyre është i barabartë me 100% të vlerës nominale (vlerës së investuar). Interesi paguhet çdo 6 muaj dhe në datën e pagesës së interesit, aplikohet tatimi mbi interesin prej 15%. Ankandet për obligacionet 2-vjeçare zhvillohen çdo muaj, ndërsa për të tjerat zhvillohen katër herë në vit, sipas një grafiku të shpallur tek faqet zyrtare në internet te Banka e Shqipërisë dhe te Ministria e Financave. Shuma minimale e lejuar për pjesëmarrje në ankandet e obligacioneve në lekë është 500 mijë lekë, ndërsa në ankandet e obligacioneve në valutë është 3 mijë Euro/USD. Individët mund të marrin pjesë në ankandet e titujve qeveritarë: a) Nëpërmjet sporteleve të Bankës së Shqipërisë (vetëm për bonot e thesarit në lekë); b) Nëpërmjet subjekteve të licencuara nga AMF, bankat e nivelit të dytë (për bonot dhe obligacionet).

Procedura

Si veprohet për të marrë pjesë në ankand

Për të marrë pjesë në ankand nëpërmjet Bankës së Shqipërisë ndiqet kjo procedurë: 1. Hapja e një llogarie Cash-i për pjesëmarrje në ankand, pranë një banke të nivelit të dytë; 2. Derdhja e fondeve që do të investohen në llogarinë e Cash-it të hapur për këtë qëllim; 3. Marrja nga banka e nivelit të dytë e IBAN-it dhe vërtetimit për bllokimin e shumës për pjesëmarrje në ankandet e Bonove të Thesarit; 4. Paraqitja e IBAN-t të llogarisë së cash-it të hapur dhe vërtetimit për bllokimin e shumës për pjesëmarrje në ankand pranë sporteleve të Bankës së Shqipërisë, ku hapet llogaria e titullit dhe plotësohet kërkesa për pjesëmarrje në ankandin e bonove të thesarit. Marrja pjesë në ankand nëpërmjet bankave bëhet me këtë procedurë: Hapja e një llogarie cash-i dhe titulli për pjesëmarrje në ankandin e titujve qeveritarë, pranë bankës; 2. Derdhja e fondeve që do të investohen në llogarinë e hapur për këtë qëllim; 3. Plotësohet kërkesa për pjesëmarrje në ankand.

/Gazeta Shqip/