Ku i merrni informacionet tuaja? Nëse nuk keni hulumtuar për to, shanset janë që shumica e atyre që mendoni se dini për gjumin bazohet në mite të vjete dhe jo fakte.
Për një studim të vitit 2019 të botuar në revistën Sleep Health, studiuesit në Shkollën e Mjekësisë Langone të Universitetit të New York, ekzaminuan 8,000 faqe në internet me informacione të lidhura me gjumin për të gjetur atë që amerikanët mendojnë se dinë për një gjumë të shëndetshëm.
Studiuesit identifikuan 20 mite të gjumit, duke filluar nga thënia se “gjatë gjumit truri nuk është aktiv” deri në “gjumi gjatë fundjavave është një mënyrë e mirë për të siguruar që ju të keni gjumë të mirë”.
Pas kësaj studiuesit përcaktuan se shumë prej nesh veprojnë me supozime të gabuara dhe jo të shëndetshme për gjumin. Më poshtë ju sjellim disa nga mitet më të mëdha të gjumit nga studimi dhe po shpjegojmë se si ato ndikojnë në shëndetin tuaj.
- Është në rregull nëse flini 5 ose më pak orë gjatë natës
Studiuesit thonë se ky mit i gjumit ka më shumë gjasa të dëmtojë shëndetin afatgjatë të dikujt. “Ne kemi dëshmi të shumta për të treguar se pesë orë gjumë në natë ose më pak, në mënyrë të vazhdueshme, rrit rrezikun tuaj për pasoja të dëmshme shëndetësore, duke përfshirë sëmundjet kardiovaskulare dhe vdekshmërinë e hershme”, thotë Rebecca Robbins, PhD, studiuese kryesore e studimit.
Akademia Amerikane e Mjekësisë së Gjumit dhe Shoqëria Kërkimore e Gjumit rekomandojnë që të rriturit të flenë rregullisht shtatë ose më shumë orë në natë për të pasur shëndet optimal.
Lexoni: Koha para ekraneve, si po ndikon tek gjumi?
- Është e shëndetshme të flesh gjumë në çdo kohë, në çdo vend
Studiuesit theksojnë se kjo është zakonisht një shenjë e privimit të gjumit, e cila mund të çojë në një mori çështjesh, duke përfshirë probleme me përqëndrimin, nervozizmin, rritjen e rrezikut të diabetit dhe një rrezik më të lartë të aksidenteve me makinë për shkak të vozitjes së përgjumur. Ata gjithashtu vërejnë se privimi i gjumit mund të jetë për shkak të apneas së gjumit, e cila ndodh kur muskujt në fytin tuaj pushojnë, duke bllokuar rrugët e frymëmarrjes dhe duke shkaktuar një ndërprerje të frymëmarrjes. Pastaj zgjoheni, gulçoni për ajër dhe ktheheni të flini përsëri.
Procesi i apneas së gjumit mund të përsëritet qindra herë në natë, duke parandaluar trupin tuaj të hyjë në gjumë të thellë dhe duke e privuar atë nga oksigjeni shumë i nevojshëm. Kjo mund të rezultojë në presion të lartë të gjakut, duke çuar në një rrezik në rritje të sulmit në zemër dhe goditje në tru.
- Gërhitja mund të jetë e bezdisshme, por është e padëmshme
Ndërsa gërhitja në vetvete nuk është e rrezikshme, mund të jetë një shenjë e apneas së gjumit, një gjendje më serioze e gjumit. Sipas Shoqatës Amerikane të Apnea të Gjumit, rreth 22 milionë amerikanë vuajnë nga një formë e apneas së gjumit, një çrregullim serioz i gjumit që duhet të kontrollohet nga një profesionist shëndetësor.
“Apnea e gjumit është jashtëzakonisht rraskapitëse”, thotë Robbins për CNN. “Këta pacientë flenë dhe pastaj zgjohen pa pushim; duke luftuar me gjumin gjatë gjithë ditës sepse janë shumë të rraskapitur.” Robbins gjithashtu vëren se apnea e gjumit është e nën-diagnostikuar. “Ne besojmë se prek rreth 30% të popullsisë dhe rreth 10% janë diagnostikuar,” thotë ajo.
- Alkooli para gjumit ju ndihmon të flini më mirë
Është vërtetuar se megjithëse një koktej mund t’ju vendosë në qetësi, alkooli gjithashtu prish gjumin duke ju penguar të arrini fazën e rëndësishme të thellë dhe qetësuese të gjumit. “Vazhdon t’ju tërheqë nga lëvizja e shpejtë e syve dhe fazat më të thella të gjumit, duke bërë që të zgjoheni pa u ndjerë të rikarikuar”, thotë Robbins për CNN.
Plus, nëse tashmë keni një problem me gjumin, të tillë si pagjumësia, apnea e gjumit ose parazomnia (të tilla si ecja në gjumë ose të folurit në gjumë), alkooli mund të rrisë këto çrregullime dhe ta bëjë një gjumë të mirë gjatë natës edhe më të vështirë.
- Një dhomë gjumi e ngrohtë është zgjidhja për një gjumë të mirë
Jo! Ne flemë më mirë në temperatura më të ftohta. Në fakt, Fondacioni Kombëtar i Gjumit thotë se temperatura ideale për gjumë është midis 16 dhe 19 gradë Celsius.
Studimet tregojnë se njerëzit me pagjumësi kanë një temperaturë më të ngrohtë të trupit menjëherë para fillimit të gjumit dhe truri i përgjigjet mirë temperaturave më të ftohta, duke e bërë gjumin më të lehtë për ata që kanë vështirësi.
Një shtrat i ri mund të ndihmojë në përmirësimin e gjumit tuaj, por rezulton se ekzistojnë edhe shumë mite për dyshekun gjithashtu.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
