Ka shumë kurse online që pretendojnë të jenë “udhëzuesi bazë për biznesin e vogël”, por pak prej tyre e përçojnë me të vërtetë kompleksitetin e ndërtimit të një biznesi nga e para. Mund të mësosh gjërat themelore – si të regjistrosh një shoqëri apo si të menaxhosh financat – por mund të humbasësh komponentin më të rëndësishëm: mënyrën e të menduarit si një sipërmarrës i suksesshëm. Këtu hyjnë në lojë librat – duke shkuar përtej blogjeve dhe kurseve online, ata të ofrojnë një qasje më të thelluar në psikologjinë e ndërtimit të një biznesi, mënyrën e të pozicionuarit për të tërhequr klientë, si të çmosh shërbimet e tua dhe shumë më tepër. Ja disa lexime thelbësore për këdo që ka një biznes të vogël, ose synon të hapë një të tillë, dhe dëshiron të futet në botën e sipërmarrjes me vetëbesim dhe fokus:
The Go-Giver – Bob Burg
Bob Burg është autor bestseller i librave për biznesin, shitjet dhe lidershipin. Në këtë libër, ai rrëfen historinë e Joe-s, një “go-getter” ambicioz i cili punon pa pushim, por duket se largohet gjithnjë e më shumë nga qëllimet e tij. Me ndihmën e një konsulenti legjendar të quajtur Pindar, Joe nis të mësojë nga disa sipërmarrës të suksesshëm se çelësi i suksesit është të kalosh nga mentaliteti “të marrësh” në atë “të japësh”, duke vendosur interesat e të tjerëve të parat. Nëpërmjet “Pesë Ligjeve të Suksesit Stratosferik”, Burg tregon sesi të krijosh vlerë për klientët, të pozicionohesh në treg dhe të ndërtosh një biznes të qëndrueshëm përmes dhënies, jo vetëm marrjes.
Buy Back Your Time – Dan Martell
Koha është burimi më i vlefshëm për një sipërmarrës. Me gjithë përpjekjet për të promovuar produkte, punësuar staf, menaxhuar financa dhe zhvilluar marketingun, dita mund të kalojë pa kuptuar. Në këtë libër, Dan Martell ndihmon sipërmarrësit të rimarrin kontrollin e kohës së tyre përmes delegimit, automatizimit dhe strukturimit të mirë të kalendarit. Ai prezanton “parimin Buyback” – idenë që duhet të punësosh të tjerë për të kryer detyrat rutinë, në mënyrë që të përqendrohesh tek ato që sjellin të ardhura. Libri ofron strategji për të shmangur lodhjen, për të rritur shitjet, për të riorganizuar ditën dhe për të ndërtuar një biznes më të qëndrueshëm.
Chillpreneur – Denise Duffield-Thomas
Ky libër është për ata sipërmarrës që duan të punojnë me zgjuarsi, jo me lodhje të tepërt. Denise Duffield-Thomas fton lexuesit të ndjekin një qasje më “chill” ndaj biznesit – duke ndërtuar sukses pa stres dhe pa orare të çmendura. Ajo rrëzon kulturën e “hustle-it” dhe promovon një mënyrë të të bërit biznes që fokusohet te bollëku dhe liria, jo tek kufizimet. Si trajnere për mënyrën e të menduarit financiar, ajo ndihmon lexuesit të ndërtojnë një biznes të përshtatur me personalitetin e tyre dhe objektivat financiare. Libri përfshin këshilla praktike për të fituar më shumë duke punuar më pak, për të vendosur çmime, për të përballuar situata të sikletshme rreth parasë dhe për të gjetur balancën në rrugën drejt suksesit.
The E-Myth Revisited – Michael E. Gerber
Ky është një libër klasik që rrëzon shumë mite rreth sipërmarrjes. Michael Gerber shpjegon se një gabim i zakonshëm është të mendosh se të jesh i mirë në një profesion të caktuar (si pjekja, instalimet apo dizajni grafik) do të thotë se mund të menaxhosh edhe një biznes të suksesshëm. Ai e quan këtë “Miti i Sipërmarrësit” – dhe thekson nevojën që një sipërmarrës të balancojë rolin e teknikut me atë të drejtuesit dhe menaxherit. Libri sugjeron ndërtimin e sistemeve dhe proceseve të brendshme për të përmirësuar efikasitetin dhe për të larguar pronarin nga punët e përditshme, duke i dhënë kohë të mendojë strategjikisht për rritjen e biznesit.
Measure What Matters – John Doerr
Për ata që kërkojnë prakticitet, ky libër është një udhërrëfyes për të vendosur objektiva të qarta dhe për të matur progresin me anë të metodës OKR (Objectives and Key Results). John Doerr tregon sesi kompani të mëdha si Google apo Fondacioni Gates kanë arritur sukses duke ndjekur parimin “mato atë që ka rëndësi”. Përmes shembujve konkretë, ai demonstron sesi edhe bizneset e vogla mund të përdorin këtë qasje për të qëndruar të fokusuar, për të prioritizuar detyrat dhe për të rritur qëndrueshmërinë dhe fitimet.
Nëse je një sipërmarrës i ri ose tashmë ke nisur rrugëtimin tënd, këto libra do të të ndihmojnë të përballosh sfidat me më shumë qartësi, motivim dhe strategji të zgjuar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
