Në një ambient të mbushur me profesionistë të shëndetësisë, sipërmarrës, media dhe përdorues të teknologjisë, u prezantua dje zyrtarisht Medapp, aplikacioni inovativ shqiptar që synon të sjellë rregull në kaosin e kujtesës sonë shëndetësore.
Ideuar dhe ndërtuar nga Gerion Treska, Medapp u paraqit si një “portofol mjekësor personal”, i aksesueshëm përmes një klikimi në telefon. Ky aplikacion ofron një mënyrë inteligjente dhe të personalizuar për të menaxhuar dokumentet mjekësore, për të ndarë të dhëna me mjekët, dhe për të gjetur klinikat përreth në kohë reale.
Gjatë eventit u zhvillua një prezantim i detajuar mbi funksionet e aplikacionit, të ndjekur nga një sesion pyetje-përgjigje ku pjesëmarrësit shprehën interes për privatësinë e të dhënave, sigurinë digjitale dhe planet për zgjerim në tregjet e huaja.
Një nga pyetjet më të diskutuara ishte:
“A do të mund të lidhet Medapp me sistemet ekzistuese të siguracioneve shëndetësore në të ardhmen?”
Në përgjigje, Treska theksoi:
“Kjo është një nga objektivat tona afatmesme. Duam që Medapp të mos jetë vetëm një app, por një urë funksionale me aktorët kyç të sistemit të kujdesit shëndetësor.”
Çfarë e bën Medapp ndryshe?
Ndryshe nga sistemet që fokusohen te institucionet, Medapp vendos në qendër pacientin individual. Ai është ndërtuar për:
-
prindërit që ndjekin kontrollet e fëmijëve,
-
pacientët kronikë që ruajnë historikun e tyre,
-
çdo qytetar që kërkon qasje të lehtë, të sigurt dhe të organizuar ndaj shëndetit të vet.
Përdoruesit mund të:
-
Krijojnë profile për të gjithë anëtarët e familjes,
-
Ngarkojnë dhe kategorizojnë dokumente mjekësore,
-
Ndajnë të dhënat me mjekun përmes një linku,
-
Përdorin një hartë interaktive për të gjetur mjekë e klinika pranë.
Nga Shqipëria në rajon
Eventi shënjoi edhe fillimin e një kapitulli të ri për startup-in:
-
Versioni 2.0 i aplikacionit është në zhvillim, me përmirësime në përvojën e përdoruesit (UX),
-
Po ndërtohen partneritete me klinika dhe farmaci,
-
Synimi është zgjerimi në tregjet ballkanike, ku problematika të ngjashme kërkojnë zgjidhje të thjeshta, por efikase.
Medapp nuk premton të zëvendësojë sistemin shëndetësor, por të bëhet partneri i qytetarit në përballjen e përditshme me të. Një shembull se si teknologjia, kur buron nga një nevojë reale dhe ndërtohet me kujdes njerëzor, mund të bëhet pjesë e jetës sonë në mënyrë të natyrshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
