Kryeministrja e Zelandës së Re, Jacinda Ardern, ka prezantuar një plan për ringritjen e ekonomisë së vendit pas pandemisë së Covid-19. Ajo ka inkurajuar që njerëzit të punojnë 4 ditë në javë, pasi kjo do të ndihmojë edhe turizmin. Një fundjavë më e gjatë ose thjesht më shumë fleksibilitet në punë, do të lejonte banorët e Zelandës së Re të udhëtonin më shumë në vend dhe kjo do të përkthehej në ndihmë për turizmin dhe ekonominë në një kohë kur kufijtë e vendit mbeten të mbyllura.
Për marrjen e këtij vendimi ajo ka diskutuar me këshillin lokal dhe operatorët turistikë, lidhur me situatën, që ka krijuar koronavirusi dhe se çfarë mund të bëhet në vazhdim.
Lexoni: Gratë lidere, shembuj të udhëheqjes së vërtetë në krizë
Gjithashtu, gjatë një komunikimi përmes Facebook, kryeministrja u shpreh se u hodhën për diskutim një numër idesh për të ndihmuar qytetarët e vendit gjatë pandemisë dhe të shfrytëzohet sa më shumë turizmi lokal. Më tej ajo përmendi që njerëzit kanë sugjeruar që do të ishte mirë sikur të kishin pak më shumë kohë për të udhëtuar.
“Kam dëgjuar shumë njerëz që sugjerojnë që të kemi 4 ditë pune në javë. Kjo në të vërtetë mbetet mes punonjësve dhe punëdhënësve. Kjo është një kohë e jashtëzakonshme dhe ne duhet të jemi të gatshëm të marrim në konsideratë ide të jashtëzakonshme,” tha Jacinda Ardern.
Zelanda e Re, me një popullsi prej pesë milionë banorësh, ka regjistruar vetëm 21 vdekje nga koronavirusi, falë bllokimit të hershëm dhe respektimit rigoroz të masave antivirus.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
