WSA mbështet sipërmarrjen rurale në Shqipëri

Në Shqipëri gratë zotërojnë vetëm 10% të fermave bujqësore, ndërkohë që mundësitë për një angazhim më të madh të tyre në aktivitetin rural mund të jetë më i madh. Organizata ‘Gratë në Bujqësinë e Qëndrueshme’ (WSA) prej disa vitesh po mbështet pjesëmarrjen e tyre në tregun e punës dhe vetëpunësimin në sektorin e bujqësisë. WSA, në bashkëpunim edhe me donatorët e huaj po bëjnë përpjekje për përmirësimin e jetës së grave të zonave rurale dhe fuqizimin e tyre, me qëllim pjesëmarrjen më aktive të tyre, në aktivitetet bujqësore, shoqëri dhe më gjerë.

Lexoni: Femrat përballen me vështirësi për punësim dhe për të hapur biznese

WSA, falë përvojës së krijuar, maturimit profesional dhe larmisë së fushave që mbulon, në specialitete të tilla si, agronomi, ekonomi, mjedis, sociologji, po nxit aktivizimin e grave në aktivitete prodhuese artizanale dhe angazhime të tjera në fermat bujqësore dhe blegtorale.

Sipërmarrësja nga Ndroqi Nadire Reka, thotë se me mbështetjen e WSA, ka mundur të zgjerojë sipërfaqen e mbjellë me perime (domate dhe kastraveca) duke marrë kredi dhe punon nën konsulturën e ekspertëve të WSA për të siguruar shitjen e të gjithë prodhimit, përmes një menaxhimi të kujdesshëm nga vetë ajo.

Kjo organizatë operon në të gjithë vendin dhe synon të sensibilizojë komunitetin rural fermëror për një angazhim më të madh të tyre në sipërmarrje.

Lexoni: “Ana e Malit”, sipërmarrja sociale e ngritur mes natyrës së qytetit të Shkodrës

Ekspertë të WSA, krahas aktiviteteve informuese, ndërgjegjësuese, po avancojnë në ngritjen e sipërmarrjeve të reja dhe fuqizimit ekonomik të tyre duke ngritur nivelin e bashkëpunimit edhe me aktorë të tjerë, organizata dhe rrjete të ndryshme që kanë në fokus zhvillimin rural.

burimi: ATA