Meta po përgatitet të prezantojë integrimin e bisedave me palë të treta në WhatsApp për përdoruesit në Evropë, njoftoi kompania të premten. Gjiganti teknologjik thekson se Akti i Tregjeve Digjitale (DMA) i BE-së e detyron t’u ofrojë përdoruesve në Evropë mundësinë për të komunikuar me njerëz që përdorin aplikacione të tjera të mesazheve që kanë zgjedhur të bëhen të ndërveprueshme me WhatsApp-in.
“Sipas testimeve të suksesshme në shkallë të vogël gjatë muajve të fundit, opsioni për përdoruesit e WhatsApp të bisedojnë drejtpërdrejt me përdorues të aplikacioneve të mesazheve BirdyChat dhe Haiket përmes ‘third-party chats’ do të nisë së shpejti në të gjithë Evropën,” shkruan Meta në një postim në blog. “Ky është një moment i rëndësishëm në përputhshmërinë e Meta-s me kërkesat e DMA-së për ndërveprueshmëri.” Përdoruesit në Evropë që zgjedhin të aktivizojnë këtë funksion do të mund të dërgojnë mesazhe, foto, mesazhe zanore, video dhe skedarë te përdoruesit e aplikacioneve të tjera. Opsioni për të krijuar grupe me përdorues të palëve të treta do të lançohet sapo partnerët e Meta-s të jenë gati ta mbështesin.
Lexo edhe: Reid Hoffman: Qeverisja e mirë duhet të mundësojë edhe teknologji të mirë!
Në muajt e ardhshëm, përdoruesit në Rajonin Evropian do të nisin të shohin një njoftim te seksioni “Settings” që shpjegon procesin e aktivizimit dhe lidhjes me njerëz në aplikacione të treta. Integrimet do të funksionojnë vetëm në Android dhe iOS, jo në desktop, web ose tabletë. Sigurisht, përdorimi i këtij opsioni mbetet tërësisht vullnetar dhe mund të çaktivizohet në çdo moment. Meta thotë se partneritetet me BirdyChat dhe Haiket janë rezultat i një bashkëpunimi trevjeçar midis shërbimeve evropiane të mesazheve dhe Komisionit Evropian për të zhvilluar një zgjidhje që respekton kërkesat e DMA-së. Gjithashtu, kompania thekson se mesazhet e palëve të treta duhet të përdorin të njëjtin nivel të enkriptimit end-to-end si WhatsApp. Meta thotë se ka siguruar që përdoruesit të kuptojnë qartë ndryshimet midis bisedave brenda WhatsApp dhe atyre me aplikacione të treta.
Në shtator 2024, Meta publikoi për herë të parë se si do të dukeshin bisedat me palë të treta, duke treguar se përdoruesit do të mund të krijojnë një dosje të veçantë për mesazhet e aplikacioneve të tjera ose të zgjedhin një “combined inbox”. Po ashtu, kompania konfirmoi se do të njoftojë përdoruesit sa herë që një aplikacion i ri mesazhesh bëhet i disponueshëm për integrim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
