Warren Buffett dhuroi të premten një tjetër shumë marramendëse prej 6 miliardë dollarësh në aksione të Berkshire Hathaway, duke i ndarë mes Fondacionit Gates dhe katër organizatave bamirëse familjare. Ky është donacioni më i madh vjetor që ai ka bërë që prej se nisi të dhurojë pasurinë e tij gati dy dekada më parë.
Dhënia e rreth 12.36 milionë aksioneve të klasit B të Berkshire e çon shumën totale të donacioneve të Buffett në mbi 60 miliardë dollarë. Ai dhuroi:
9.43 milionë aksione për Fondacionin Gates, 943,384 aksione për Fondacionin Susan Thompson Buffett, dhe nga 660,366 aksione për secilën prej tre fondacioneve që drejtohen nga fëmijët e tij: Howard G. Buffett Foundation, Sherwood Foundation dhe NoVo Foundation.
Edhe pas këtij donacioni, Buffett zotëron ende 13.8% të aksioneve të Berkshire, sipas të dhënave zyrtare mbi aksionet në qarkullim. Pasuria e tij neto para këtij donacioni vlerësohej në 152 miliardë dollarë, duke e renditur atë si personin e pestë më të pasur në botë, sipas revistës Forbes. Pas donacionit, ai pritet të zërë vendin e gjashtë. Donacioni i sivjetshëm i kalon atë të qershorit të kaluar, kur Buffett dhuroi 5.3 miliardë dollarë, dhe atë të nëntorit, kur kontribuoi edhe 1.14 miliardë dollarë për fondacionet familjare. Në një deklaratë, Buffett theksoi se nuk ka ndërmend të shesë asnjë nga aksionet e tij të Berkshire. Aktualisht 94 vjeç, Buffett filloi të dhurojë pasurinë e tij në vitin 2006.
Lexo edhe:4 vlerat që duhet të ketë çdo kompani për të qenë e suksesshme
Ai ndryshoi testamentin e tij vitin e kaluar, duke përcaktuar që 99.5% e pasurisë së mbetur pas vdekjes të kalojë në një fond bamirës të administruar nga fëmijët e tij. Ata do të kenë rreth një dekadë kohë për ta shpërndarë fondin dhe vendimet duhet të merren në mënyrë unanime. Susie Buffett është 71 vjeç, Howard 70 dhe Peter 67. Warren Buffett ka udhëhequr kompaninë Berkshire Hathaway me seli në Omaha, Nebraska që prej vitit 1965. Konglomerati prej 1.05 trilionë dollarësh zotëron rreth 200 biznese, përfshirë kompaninë e sigurimeve Geico, hekurudhën BNSF dhe aksione në kompani të mëdha si Apple dhe American Express. Susie Buffett drejton Fondacionin Susan Thompson Buffett, i cili mbështet shëndetin riprodhues dhe mban emrin e nënës së saj, gruaja e parë e Warren Buffett. Fondacioni Sherwood mbështet organizata jofitimprurëse në Nebraska dhe programet e edukimit të hershëm. Fondacioni Howard G. Buffett fokusohet në luftën kundër urisë globale, trafikimit njerëzor dhe konfliktet ndërkombëtare. Ndërsa Fondacioni NoVo angazhohet për fuqizimin e vajzave dhe grave të margjinalizuara, si dhe për komunitetet indigjene. Buffett ka deklaruar më herët se donacionet për Fondacionin Gates do të përfundojnë pas vdekjes së tij.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
