Vlera e pasaportave, Shqipëria pozicionohet gjashtë vende më lart se vjet

Sipas indeksit global të pasaportave që bëhet publik çdo vit nga Henley and Partners, Shqipëria rezulton me rritje të ndjeshme në disa pozicione krahasuar me vjet. Indeksi mat fuqinë e pasaportave në të gjitha shtetet e botës. Këtë vit Shqipëria renditet në vendin e 48-të. Në vitin 2018 ajo renditej në vendin e 54-ët. Sipas këtij indeksi, për të gjithë ato që kanë një pasaportë shqiptare, mund të kryejnë lëvizje të lirë në 116 vende të botës, krahasuar me një vit më parë ku mund të lëviznin vetëm në 100 të tillë. Duke u ngjitur me gjashtë pozicione, Shqipëria ka mundur të lërë pas dy vende të tjera europiane siç janë Gjeorgjia dhe Turqia. Nga vendet e rajonit, Kosova është shteti, i cili pozicionohet i fundit. Këtë vit, sipas indeksit, janë 5 vende të reja në të cilat të gjithë ata që zotërojnë një pasaportë të Kosovës, mund të lëvizin lirshëm, kështu që, numri i shteteve ku ata mund të lëvizin lirshëm shkon në 43.

Lexo:  Sa vlen pasaporta shqiptare?!

Në harkun kohor prej 10 vitesh Shqipëria renditet si një nga shtetet që ka bërë progres në renditjen globale, duke u ngjitur me 28 vende. Pavarësisht kësaj, në Europë vijon të mbetet ndër vendet me pasaportën më të dobët. Shtetet me pasaportën më të fuqishme rezultojnë Japonia, Singapori dhe Koreja e Jugut.