Pavarësisht, se ministrja e Arsimit, Sportit dhe Rinisë ka njoftuar shtyrjen e nisjes së vitit të ri shkollor, me qëllim realizimin e mësimit plotësues, në Fletoren Zyrtare është publikuar udhëzimi i vjetër, që parashikon mësime shtesë nga data 1-10 shtator. Pra aktualisht nuk ka asnjë dokument zyrtar, që parashikon afatet e njoftuar nga ministrja Kushi të nisjes dhe përfundimit të vitit shkollor 2021-2022.
Sipas udhëzimit të publikuar në Fletoren Zyrtare për arsimin fillor dhe arsimin e mesëm të ulët parashikohet përsëritja 2 javore e temave mësimore, për të cilat janë evidentuar mangësi, për shkak të zhvillimit të mësimit në kushtet e pandemisë, teksa ky proces do të realizohet gjatë periudhës 1–10 shtator 2021. Por, në një deklaratë për mediat të para disa ditëve, ministrja Evis Kushi tha se viti i ri shkollor do të nisë në datë 27 shtator, ndërkohë që periudha e mësimit plotësues do të jetë në periudhën 1-24 shtator.
Megjithatë, pavarësisht se shtyrja me 2 javë e nisjes së vitit të ri shkollor ka për qëllim rekuperimin e mangësive të krijuara gjatë mësimit online për shkak të pandemisë, nxënësit nuk janë të detyruar të shkojnë në shkollë. Ndërkaq, ajo që vjen e re për këtë vit shkollor është futja për herë të parë e gjuhës angleze në klasat e para si dhe trajnimi i mësuesve përkatës që do të japin këto orë mësimore.
Lexoni: Shtyhet data e fillimit të vitit të ri shkollor 2021-2022
Po ashtu, kërkohet vendosja e një bashkëpunimi të ngushtë të stafit me prindërit dhe komunitetin, për krijimin e një modeli të ri të sjelljes së nxënësve, mësuesve dhe prindërve në ambientet e shkollës dhe jashtë saj, bazuar në protokollet e situatës së COVID-19. Nga ana tjetër, bazuar në të dhënat dhe në protokollet që përcaktohen nga Ministria e Shëndetësisë dhe e Mbrojtjes Sociale, si dhe në varësi të situatës pandemike të shkaktuar nga COVID-19, institucionet arsimore mund të zbatojnë skenarët e ndjekur gjatë vitit shkollor 2020–2021.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
