Një propozim i Komisionit Evropian për ndalimin e makinave me motorë me djegie për flotat me qira dhe ato korporative duke nisur nga viti 2030 ka nxitur debate të ashpra në vendet anëtare të Bashkimit Evropian. Masa synon që pas këtij viti, kompanitë të lejohen të blejnë vetëm automjete elektrike, sipas një raporti të publikuar nga gazeta gjermane BILD.
Propozimi, i cili ende ndodhet në fazat fillestare të diskutimit teknik brenda Komisionit, është pritur me shqetësim të madh nga përfaqësues të qendrës së djathtë në Gjermani dhe nga industria automobilistike, të cilët paralajmërojnë pasoja ekonomike dhe sociale. Kryetari i CDU-së në Baden-Württemberg, Manuel Hagel, ka reaguar përmes një letre të hapur drejtuar presidentes së Komisionit Evropian, Ursula von der Leyen, ku e quan propozimin “një sulm ndaj lirisë së sipërmarrjes” dhe “të shkëputur nga realiteti”.
Lexo edhe:Riana Muçobega: Si po riformatohet marketingu me inteligjencën artificiale
“Infrastruktura për karikimin e automjeteve elektrike mbetet e papërshtatshme, sidomos në zonat rurale,” shkruan Hagel, duke shtuar se karburantet sintetike dhe motorët me djegie të përmirësuar nuk duhet të përjashtohen si alternativa për reduktimin e emetimeve të CO₂.
Edhe eurodeputeti i CDU-së dhe zëdhënës për transportin në grupin e Partisë Popullore Evropiane, Jens Gieseke, ka kritikuar ashpër nismën, duke e cilësuar si “ndërhyrje masive në treg” dhe “një shuplakë për industrinë evropiane të automobilave”. Ai kërkon që Komisioni të mos përjashtojë teknologjitë alternative dhe të rishikojë kufizimet për flotat në bazë të emetimeve të CO₂, për të shmangur pasoja të padëshiruara për sektorin.
Ndërkohë, pas një takimi me kryeministrin e Norvegjisë në Berlin, kancelari gjerman Friedrich Merz e quajti industrinë automobilistike “një nga shtyllat kryesore të ekonomisë evropiane”, duke paralajmëruar se fokusimi vetëm te teknologjia elektrike mund të dëmtojë konkurrueshmërinë e kontinentit. Sipas Süddeutsche Zeitung, propozimi nuk ka ende mbështetje të plotë politike brenda Komisionit, por diskutimet intensive që po zhvillohen tregojnë për përplasje të forta që pritet të shpërthejnë në muajt në vijim.
E ardhmja e automjeteve me motorë me djegie në Evropë mbetet e paqartë, ndërsa BE përballet me sfidën për të balancuar qëllimet klimatike me nevojën për ruajtjen e fleksibilitetit teknologjik dhe zhvillimit industrial.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
