Universiteti Bedër organizon aktivitetin me temë “Ruaj traditën, festo shqip” - Business Magazine Albania

Universiteti Bedër organizon aktivitetin me temë “Ruaj traditën, festo shqip”


Ruajtja dhe përcjellja e folklorit tonë shqiptar ishte kryefjala e aktivitetit më të fundit organizuar nga studentët e Kolegjit Universitetar Bedër “Panel Diskutimi: Ruaj traditën, festo shqip”.

Të pranishëm në këtë aktivitet ishin personalitete të fushës, të cilët kanë kontribuar ndër vite në ruajtjen e folklorit shqiptar. Përmendim këtu rektorin e Kolegjit Universitar Bedër, Prof. Dr. Ferdinand Gjana, pedagogia dhe koordinatorja e fushatës Edlira Mali, Amanda Hysa- Drejtoresha e Qendrës Kombëtare të Veprimtarive Folklorike Doc. Dr. Agron Tufa, koreografia Lindita Kaimi, koreografi Genc Kastrati, Ilirjana Kaceli – studiuese dhe pedagoge e historisë, balerina e mirënjohur e Teatrit të Operas dhe Baletit Isida Mollaymeri, Ermal Sela, muzikant dhe koleksionist instrumentash, këngëtari Lekë Pecnika, lahutari Jonus Delaj dhe Gjin Pepkolaj si dhe studentë të universitetit, nën moderimin e gazetares Anisa Ymeri.

“Ruaj traditën, festo shqip” është slogani në të cilin studentët e Universitetit Bedër kanë nisur këtë fushatë, që ka për qëllim ndërgjegjësimin e të rinjve për ruajtjen e folklorit, ruajtjen e vlerave shqiptare, i fokusuar kryesisht në këngë dhe valle. Këngë e valle shqiptare që ndoshta brezi i ri po i humbet, nuk po u kushton rëndësi siç ka qenë më herët. Kjo fushatë është ndërmarrë në kuadër të procesit akademik në lëndën Konceptim dhe Menaxhim Fushatash me udhëheqëse profesoreshë Edlira Mali.

Një fushatë e menduar ndryshe, jo që të mbesë thjesht një fushatë e një lënde semestrale, por të arrihen disa qëllime dhe të ketë një vazhdimësi. Të ndërgjegjësohen të rinjtë, por jo vetëm duke organizuar sa më shumë aktivitete kulturore, të cilat do të kenë në fokus traditën dhe do të promovojnë vlerat kulturore shqiptare. Në kuadër të fushatës studentët e universitetit Bedër kanë organizuar disa aktivitete dhe në vazhdimësi kanë në plan organizime dhe aktivitete të reja. Në fund të fushatës pritet të organizohet një koncert i madhe me këngë dhe valle popullore.

Përveç se promovimi i folklorit në sytë e të rinjve, ky organizim ka për qëllim nxitjen e këtyre të fundit që të ndërmarrin nisma dhe aktivitete të tjera në vazhdim. Të bëjnë bashkë aktorët e shoqërisë, individë, institucionë të kulturës, artistë, koerografë, kompozitorë, personalitete të fushës, të cilët kanë kontribuar në vite në folklorin shqiptar dhe kanë investuar për ta pasuruar atë.

Ky aktivitet u zhvillua pikërisht për të treguar se kush më mirë se të rinjtë mund të kontribuojë për ruajtjen e folklorit, ruajtjen e vlerave, sepse jemi në një kohë ku folklori ka nevojë për vëmendje që të transmetohet brez pas brezi, pasi duke pasur të forta rrënjët tona mund të kemi të forta edhe degët tona.

Në fjalën e tij rektori i Universitetit Prof. Dr. Ferdinand theksoi se institucioni që në momentin e parë, në misionin e tij ka patur promovimin e vlerave dhe një proces edukimi të mbushur me vlera, apo të përbërë nga vlerat dhe këtë janë përpjekur ta kenë në të gjithë hallkat e këtij institucioni. Këtë kanë dashur të përcjellin dhe me këtë event, përcjelljen e vlerave të folklorit shqiptar.

Këto nisma janë shumë të mira për të tashmen dhe të ardhmen e një vendi të vogël si Shqipëria, për përcjelljen e vlerave dhe të këtyre pasurive të paçmuara që zotëron. E shkuara nuk humbet ajo vetëm përsëritet, siç thoshte Volkeri. Shqiptari nuk mund të harrojë as lahutën, as kostumin, as ritet, pasi pa ato do të mbetet pa identitet.

Koordinatorja e fushatës Edlira Mali, pedagoge në universitet shprehu një vlerësim të madh për studentët duke thënë se “Unë studentët i konsideroj si një forcë mendore shumë e madhe, pasi kanë një kapacitet të të menduarit dhe të përqafuarit të gjërave të bukura të paimagjinueshme. Dhe ajo thënia që kjo Shqipëri nuk bëhet është shumë utopike, unë besoj që me këtë rini që kemi ne sot, Shqipëria do bëhet dhe Shqipëria po bëhet çdo ditë e më tepër.”

Gjithashtu e ftuara e nderit në qendër të tavolinës ishte lahuta, instrumenti muzikor që na drithëron teksa e dëgjojmë të luhet, një instrument që është në qelizën e kulturës sonë muzikore. Aty e kuptojmë që jo vetëm duhet të përqafojmë dhe kultivojme folklorin tonë, por duhet ta ruajmë me fanatizëm, pasi jemi një vend kaq i vogël, por që mbartim vlera të mëdha.

Gjatë takimit u diskutuan edhe problematikat me të cilat haset sot folklori, rreziku i humbjes së instrumenteve të vjetra muzikore popullore të folkut etnik dhe se çfarë të bëjmë për t’i rregulluar këto problematika.

“Folklori gjithmonë evolon nuk i takon vetëm të kaluarës, ne duhet të nxisim iniciativa të tilla,” u shpreh Genc Kastrati, koreografi i Ansamblit Shtetëror të Këngëve e Valleve Popullore.

Ai duke ndërmarrë iniciativa personale, u ka mësuar të huajve vallet popullore shqiptare, pasi ai beson fort tek vlerat tona duke këmbëngulur se këto valle duhet të bëhen pjesë e kurrikulës mësimore shqiptare.

Në fund takimi u mbyll me pjesë të luajtura me lahutë nga dy lahutarët Jonus Delaj dhe Gjin Pepkolaj duke na kujtuar vlimin e gjakut tek ne shqiptaët teksa dëgjojnë këto ritme madhështore.

BusinessMag ishte sponsor mediatik i aktivitetit. Ne mbështesim dhe u bëjmë jehonë vlerave të vendit tonë dhe nuk kishte si të ndodhte ndryshe edhe me këtë aktivitet.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #37 - Prill 2025

Mendo lokalisht, vepro globalisht

Viti 2025 vjen me sfida dhe mundësi të mëdha në sektorë të rëndësishëm të ekonomisë sonë. Turizmi shqiptar po përjeton një rritje të jashtëzakonshme, ku duket se pas një prezantimi mbresëlënës në ITB Berlin, Shqipëria është gati të pozicionohet si një destinacion i rëndësishëm në hartën botërore me një ofertë të larmishme turistike. Paralelisht, tregu i pasurive të paluajtshme po përballet me ndyshime të shumta, ku investimet strategjike dhe zhvillimi i qëndrueshëm janë kyç për suksesin e këtij sektori.
Teknologjia vazhdon të transformojë mënyrën se si jetojmë dhe punojmë. Inteligjenca Artificiale nuk është më thjesht një mjet ndihmës, por një faktor vendimtar që po shkruan rregulla të reja në çdo industri.

Bota përballë sfidës së krijimit të një axhende më humane për Inteligjencën Artificiale – si mund ta vendosim atë në shërbim të njeriut, pa e shndërruar në një rrezik për demokracinë dhe ekonominë globale? Ndërsa jetojmë në një botë që ndryshon vazhdimisht, shohim sesi Fintech është një realitet i padiskutueshëm që po lehtëson ditë pas dite jetën dhe veprimtarinë e bizneseve dhe individëve. Ajo që konfirmojmë me siguri në këtë edicion është sesi bizneset shqiptare po përqafojnë gjithnjë e më shumë një qasje europiane në menaxhim, kulturë, lidership dhe investime, duke u nxitur drejt inovacionit dhe …

Shiko më shumë
Na ndiqni në rrjetet sociale
0