iGenius, startupi i inteligjencës artificiale themeluar nga emigranti shqiptar në Itali, Uljan Sharka, njoftoi ditën e martë se po kërkon një investim me vlerë prej 650 milionë euro, financim i cili do ta vlerësonte kompaninë me 1.7 miliardë euro
Themeluar në 2016-ën në Milano, Uljan Sharka dhe iGenius u shpall u shpall fitues i çmimit ICT Inovacioni i Vitit në edicionin e 6-të të Albanian ICT Awards.
Ndërsa po përpiqet të zgjerohet në sektorin europian të inteligjencës artificiale dhe të konkurrojë me emrat e mëdhenj si Mistral në Francë apo DeepL në Gjermani, iGenius deri më sot ka siguruar investime me vlerë 1.05 miliardë euro nga Angel Capital Managment dhe Eurizon Asset Managament, njësi e bankës Intesa Sanpaolo.
Mes klientëve të iGenius janë Allianz, Aon, Enel dhe Intesa Sanpaolo ndërsa Sharka tha se synon të arrijë 20 milionë euro të ardhura vjetore deri në fund të 2024.
Në fillim të muajit, iGenius lançoi “Italia,” një model AI (LLM) me burim të hapur trajnuar ekskluzivisht në gjuhën italiane dhe që mund të njihte të gjitha nuancat linguistike dhe kulturore të gjuhës.
Kompania beson se modelet e centralizuara dhe të mbyllura nuk janë të përshtatshme për sektorë të rregulluar shumë si financat dhe qeveria.
Mbyllja e këtij financimi do ta katapultonte iGenius në një unicorn mes startupeve elitare të inteligjencës artificiale në skenën europiane dhe botërore.
“Sot hedhim një hap të madh përpara me kapital shtesë për të shtyrë përpara avancimet tona AI në sektorët e rregulluar. Qëllimi ynë është t’i bëjmë të dhënat njerëzore, të ripërcaktojmë të ardhmen e punës dhe të mbyllim hendekun e aftësive, duke fuqizuar individët dhe bizneset për të arritur lartësi të reja,” tha CEO i iGenius, Uljan Sharka.
Kompania operon një ekip ndërkombëtar me zyra në Milano dhe Nju Jork ndërsa investon qindra miliona euro për ndërtimin e modeleve AI të cilave organizatat mund tu besojnë dhe ti adoptojnë në shkallë të gjerë.
Kush është Uljan Sharka?
Uljani emigroi në Itali në moshë të vogël në 2008 ndërsa pasioni për teknologjinë bëri që të fillonte studimet në shkenca kompjuterike dhe punonte në të njëjtën kohë që të mbështeste financiarisht studimet.
Mes peripecish të shumta ai themeloi iGenius, një startup që do të rritej me shpejtësi në skenën Italiane të teknologjisë. Në 2018-ën iGenius mori një investim prej 7 milionë dollarësh, më i larti dhënë ndonjëherë në Itali nga një grup investitorësh engjëj.
iGenius është vlerësuar ndër startupet më të mira ndërkombëtare nga Facebook, Google, Web Summit, Startup Grind dhe TechCrunch.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
