Një studim i ri nga universiteti i Bergenit tregon se aplikacionet dhe pajisjet për gjurmimin e gjumit mund të përkeqësojnë ankthin tek personat me pagjumësi, duke i bërë ata më të përqendruar tek cilësia e gjumit dhe monitorimi i tij.
Håkon Lundekvam Berge, autori kryesor i studimit, shpjegon se “zhvillimi i shpejtë i teknologjisë së aplikacioneve për gjumë kërkon që komuniteti shkencor të qëndrojë në hap me këto përparime.” Studimi zbuloi se të rinjtë, sidomos grupmoshat 18–35 dhe 36–50, raportuan më shumë përfitime të perceptuara, si përmirësim të gjumit dhe tendencë më të madhe për ta prioritarizuar, por edhe më shumë ankth dhe stres.
Studimi analizoi mbi një mijë persona në Norvegji dhe thekson se përqendrimi i tepërt tek rezultatet e aplikacioneve mund të përkeqësojë cilësinë e gjumit, sidomos tek ata me simptoma të pagjumësisë. Karl Erik Lundekvam, autori i dytë, shtoi se përdoruesit e këtij grupi shpesh shfaqin shqetësim dhe fokus të rritur ndaj gjumit, gjë që pajisjet e monitorimit mund ta amplifikojnë.
Ekspertët sugjerojnë që përdoruesit të kuptojnë saktësinë e masave që aplikacionet ofrojnë dhe, nëse ankthi rritet, të fikin pajisjet gjatë natës ose të çaktivizojnë njoftimet. Megjithatë, të dhënat mund të përdoren si motivim për krijimin e zakoneve të shëndetshme të gjumit, si zvogëlimi i kohës së kaluar para ekranit përpara gjumit.
Industria e gjurmimit të gjumit është në rritje: vetëm tregu amerikan gjeneroi rreth 5 miliardë dollarë në 2023 dhe pritet të dyfishohet deri në 2030, sipas Grand View Research.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
