Pas studimit të fizibilitetit, qeveritë e Shqipërisë dhe Malit të Zi kanë sigurar fondin falas prej 2.5 milionë eurosh nga Bashkimi Europian, për hartimit e projektit konkret për gazsjellësin adriatiko-jonian “IAP”. Ky projekt nis si një degëzim i gazjellësit TAP nga Shqipëria deri në Kroaci.
“Pas përfundimit me sukses të studimit të fizibilitetit të projektit IAP, tashmë kemi kaluar në fazën e hartimit të projektit. Duke pasur një projekt ne do të jemi në gjendje që të kemi një paketë të plotë studimore, për të bashkëpunuar me investitorë të huaj”, tha Dritan Spahiu, drejtori i hidrokarbureve në MEI.
Shqipëria, Kroacia, Bosnjë-Hercegovina dhe Mali i Zi kanë rënë dakord për ndërtimin e projektit dhe kanë filluar lëshimin e lejeve përkatëse. Pritet të zgjidhet se çfarë modeli do të ketë kompania, që do të menaxhojë gazsjellësin.
Ky i fundit do të ulte kostot e ndërtimit të rrjetit të brendshëm të gazit në Shqipëri, pasi do të krijonte infrastrukturën e transmetimit me gazsjellësin tjetër TAP, nga jugu deri në veri.
“Projekti IAP do të bëjë të mundur pikërisht gazifikimin e pjesës së veriut të Shqipërisë, duke filluar nga Durrësi, Lezha e Shkodra. Nëse ndërtohet projekti IAP me kostot e tij dhe ka një tarifë të caktuar që mbulon kostot, kjo do të bëjë të mundur që Shqipëria të mos ndërtojë një rrjet të dedikuar të transmetimit për zonën e veriut, por do të përdorë projektin IAP”, theksoi më tej Dritan Spahiu.
Gazsjellësi adriatiko-jonian ka një gjatësi prej 516 kilometrash dhe një kosto ndërtimi prej gati 630 milionë eurosh. Kapaciteti i llogaritur është 5 miliardë metër kub gaz në vit.
Burimi: top-channel.tv
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
