Në kuadër të javës së integritetit, projekti SoGis i ideuar nga kompania topografike GjeoVjosa zhvilloi një takim të dedikuar pikërisht integritetit dhe rëndësisë që ka ai si element kyç në jetën tonë profesionale dhe personale.
Eventi i zhvilluar gjatë datës 5 shkurt, mblodhi bashkë studentë të gjeografisë dhe shkencave sociale, të cilët janë të angazhuar në projekt.
Gjatë fjalës së hapjes Spartak Likaj, CEO i Gjeo-Vjosa prezantoi qëllimin e ideimit dhe zhvillimi të projektit So-Gis. Ky projekt është një platformë online që ofron shërbime në fushën e gjeografisë dhe të mjedisit në përgjithësi. Fokusi kryesor i SoGis është i përqendruar në katër pika kryesore:
E-learning, të mësuarit elektronikisht
Banka e Pyetësorëve, e cila u mundëson qytetarëve të shprehin opinionet e tyre për çështje të caktuara
Shërbimet e informacionit gjeografik
SDG- Treguesit e Zhvillimit të Qëndrueshëm
Duke qenë se SoGis është një platformë që ofron shërbime online, ajo shfrytëzon teknologjinë për të arritur tek përdoruesit.
Teknologjia ka ndikuar në rikonceptimin e integritetit njerëzor, duke qenë se është zhvilluar me hapa të shpejtë dhe i ka bërë njerëzit të varur prej saj në një masë të konsiderueshme. Gjatë eventit pati një panel të larmishëm diskutimi pikërisht mbi ndikimin që ka pasur teknologjia në integritetin dhe vlerat morale.
Lexo këtu: Së bashku për më shumë transparencë dhe gjithëpërfshirje, projekti SoGIS
Paneli i moderuar nga CEO i Gjeo-Vjosa, përbëhej nga Gerti Boshnjaku, themelues dhe CEO i Business Magazine Albania, Dritan Mezini, bashkëthemelues i website-t duapune.com dhe drejtor ekzekutiv i Shoqatës Shqiptare ICT, Shkëlzen Marku bashkëthemelues dhe drejtor menaxhimi i Yunus Social Business Balkans dhe Lorenc Cala, drejtor i Autoritetit Shtetëror për Informacionin Gjeografik.
Panelistët theksuan se shoqëria shqiptare është ende konsumatore e teknologjisë dhe nuk ka arritur të konsolidohet në përdorimin e mirëfilltë të saj. Gjatë diskutimit u vu theksi edhe tek fakti që për shkak të keqpërdorimit të teknologjisë, njerëzit kanë humbur integritetin dhe besimin tek njëri-tjetri.
“Nëpërmjet burimeve dhe modeleve që na serviren nga jashtë ne mund të mësojmë sesi ta përdorim teknologjinë siç duhet”, tha ndër të tjera Gerti Boshnjaku.
“Teknologjia duhet të jetë thjesht mjet për të arritur qëllimet, kurrsesi nuk duhet të shndërrohet qëllim në vetvete”, u shpreh Dritan Mezini.
Panelistët ishin shumë optimistë përsa i përket investimeve që mund të bëjnë të rinjtë në vend. Ndër të tjera u tha se mundësitë për të shpërthyer e pasur sukses janë më të larta në vendin tonë sesa jashtë. Në Shqipëri është më e thjeshtë sepse konkurrenca është më e ulët. Ata thanë se ajo çka është e rëndësishme për të ecur përpara, është të bësh atë që do, të punosh me dëshirë dhe mbi të gjitha t’i bësh gjërat me zemër. Njerëzit duhet të mbështesin njëri-tjetrin dhe të jenë më të lidhur për të ndihmuar iniciativat e njëri-tjetrit. Integriteti është një vlerë morale, prandaj duhet promovuar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English