Banka e Shqipërisë dhe Shoqata e Bankave po rrisin përpjekjet për edukimin financiar duke sjellë një qasje tjetër të popullsisë ndaj këtij sistemi. Interesi për të forcuar edukimin financiar po rritet edhe për faktin se vendi ka shumë për të bërë në këtë drejtim.
Gjatë kësaj jave, BSH dhe Shoqata e Bankave testuan njohuritë financiare të nxënësve të shkollave në të gjithë vendin, duke zhvilluar një konkurs me rreth 200 nxënës.
Konkurrentët u ndanë në 149 skuadra me dy persona, duke përfaqësuar shkollat në të gjithë vendin.
Nxënësit duhet të zgjidhnin formula të vështira për problema me pagesën e normave të interesit të kredisë, apo zbatimin e mënyrës së taksimit. Më shumë se gjysma e nxënësve iu përgjigj saktë të gjitha pyetjeve. Ndërsa për fitoren, ishte vendimtare koha e dhënies së përgjigjes.
Dy fituesit e konkursit do të përfaqësojnë Shqipërinë në Bruksel në eventin që pason në muajin maj.
Përmes një platforme, ku nxënësit zgjidhnin përgjigjen nga smartphone, konkursi u zhvillua në kohë reale. Shkolla “Emin Duraku” në Tiranë fitoi vendin e parë ndërsa në vend të dytë u renditën nxënësit e shkollës “Sotir Gura”, Korçë.
Ky event që ndodh tashmë në të gjitha shtetet e Europës u zhvillua tek ne për herë të dytë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
