Sot jetojmë në një botë ku çdo gjë ndryshon me shpejtësi: nga inteligjenca artificiale dhe automatizimi, te puna në distancë, krizat në treg dhe riorganizimet e shpeshta. Për këtë arsye, adaptueshmëria është kthyer në një nga aftësitë më të rëndësishme për një lider. Nuk mjafton të jesh punëtor dhe të arrish objektivat; udhëheqësit që dallohen janë ata që tregojnë fleksibilitet, qetësi dhe vizion në çdo situatë.
Shumë njerëz pohojnë se janë të adaptueshëm, por pak e tregojnë këtë në mënyrë të qartë dhe të qëndrueshme. Për të ecur më lart në karrierë, duhet jo vetëm të jesh i adaptueshëm, por edhe të dëshmosh këtë aftësi përmes sjelljes tënde të përditshme.
Çfarë e bën një lider të adaptueshëm?
Artikulli përmend tri aftësi kryesore:
1. Shkathtësia, aftësia për t’i orientuar të tjerët
Të jesh i shkathët nuk do të thotë të pranosh çdo vendim, por të jesh i hapur ndaj mënyrave të reja të punës dhe të shohësh ndryshimin si mundësi, jo kërcënim.
Shembulli:
Një drejtues i analizës së tregut mori lajmin se i gjithë ekipi mund të shkrihej nëse nuk kalonte shpejt drejt proceseve të reja me AI. Në fillim u ndje i padrejtësuar, por vendosi ta shihte situatën si mundësi për t’i mësuar ekipit aftësi të reja dhe për të përmirësuar proceset. Brenda 60 ditësh krijoi një plan transformimi dhe përfshiu gjithë ekipin. Rezultati ishte ulja e kostove dhe rritja e shpejtësisë së punës. Kompania hoqi dorë nga offshoring-u dhe e vlerësoi ekipin si shembull. Ky drejtues u dallua pikërisht për aftësinë për t’u kthyer shpejt dhe për të frymëzuar ekipin.
2. Qëndrueshmëria, aftësia për të qëndruar i qetë nën presion
Një lider i mirë nuk lë që paniku të dominojë ekipin. Edhe në periudha të vështira, si largime nga puna, kriza financiare apo ndryshime të mëdha, liderët rezilientë komunikojnë qartë, tregojnë maturi dhe i ndihmojnë njerëzit të fokusohen te gjërat që mund të kontrollojnë: aftësitë, zhvillimi dhe bashkëpunimi.
3. Parashikimi, aftësia për të parë më larg sesa të tjerët
Liderët me vizion analizojnë tregun, vëzhgojnë konkurrentët dhe identifikojnë rreziqe para se të ndodhin. Shembulli i VP-së së operacioneve: Ajo vuri re sinjale të hershme për rritje tarifash dhe probleme të zinxhirit të furnizimit. Para se kriza të shpërthente, diversifikoi furnitorët dhe krijoi plane rezervë. Kur tarifat u vendosën, kompania e saj shmangu kostot që të tjerët nuk i shmangën. Kjo aftësi i siguroi promovim. Parashikimi është i rëndësishëm edhe për teknologjinë: liderët duhet të kuptojnë si po ndryshon tregu dhe çfarë aftësish do t’i duhen ekipit të tyre në të ardhmen.
Lexo edhe: A po ndodh revolucioni i heshtur i bizneseve të vogla në Europë?
Si ta tregosh adaptueshmërinë në praktikë?
Adaptueshmëria nuk është slogani “Unë di të përshtatem”. Ajo shihet në sjellje të përditshme.
1. Trego se je i gatshëm për ndryshim çdo ditë
Kur një projekt dështon apo kur tregu ndryshon papritur, mënyra se si reagon është prova më e mirë.
Gjuha jote ka rëndësi:
❌ “Kështu bëhet gjithmonë.”
✔️ “Si mund ta bëjmë më mirë?”
✔️ “Po sikur ta nisnim nga e para sot?”
Përfshirja vullnetare në projekte të reja, sidomos në fusha që nuk i njeh shumë, tregon kurajë dhe fleksibilitet.
2. Kombino empatinë me përgjegjësinë
Një lider i mirë mbështet ekipin, por mban edhe standarde të qarta pune. Empatia mban njerëzit të lidhur me punën; përgjegjësia i çon përpara.
Pyet veten:
- A ruaj qetësinë kur kompania kalon vështirësi?
- A i kuptoj shqetësimet e ekipit, por gjithsesi i mbaj përgjegjës për punën?
- A po mësoj vetë mjaftueshëm shpejt që të udhëheq të tjerët?
Këto reflektime tregojnë ku mund të përmirësohesh.
3. Trego se je i hapur për të mësuar vazhdimisht
Bota e teknologjisë po ndryshon me ritme shumë të shpejta. Liderët që rriten në karrierë:
- Kërkojnë feedback.
- Investojnë te trajnimet dhe zhvillimi personal.
- I ndihmojnë ekipet të ndërtojnë aftësi të reja.
- Qëndrojnë të informuar për risitë teknologjike.
Mësimi i vazhdueshëm është themeli i adaptueshmërisë.
Gabimet që dëmtojnë perceptimin e adaptueshmërisë
- Të ngatërrosh stabilitetin me adaptueshmërinë
Qëndrueshmëria është e vlefshme, por evolucioni i mendimit dhe aftësive është ai që të çon përpara. - Të mendosh se puna e fortë mjafton për rritje
Liderët duhet të tregojnë jo vetëm punë të mirë, por edhe ndikim, vizion dhe aftësi për të parë të gjithë organizatën, jo vetëm ekipin e tyre. - Frika për të treguar dobësitë
Pranimi i gabimeve ose pasigurive nuk të ul reputacionin, përkundrazi, e rrit besimin dhe krijon hapësirë për ide të reja.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
