Kanceri vazhdon të jetë një nga shkaqet kryesore të vdekjeve në mbarë botën. Instituti Kombëtar i Kancerit raportoi se në vitin 2022 kishte pothuajse 20 milionë raste të reja të diagnostikuara me kancer dhe 9.7 milionë vdekje të lidhura me këtë sëmundje. Projektohet që deri në vitin 2040, numri i rasteve të reja të arrijë në 29.9 milionë. Craif, një startup i themeluar nga Universiteti i Nagoyas në Japoni në vitin 2018, po zhvillon një softuer të mbështetur nga inteligjenca artificiale për zbulimin e hershëm të kancerit, duke përdorur mikroRNA (miRNA). Së fundmi, kompania ka siguruar 22 milionë dollarë në një raund financimi Series C për të zgjeruar prezencën në tregun amerikan dhe për të forcuar aktivitetet e saj kërkimore dhe zhvillimore (R&D).
Në një intervistë për TechCrunch, bashkëthemeluesi dhe CEO i Craif, Ryuichi Onose, konfirmoi se kompania e përfundoi raundin e Series C me një vlerësim pak më pak se 100 milionë dollarë. Raundi i fundit i financimit u udhëhoq nga investitori ekzistues X&KSK, së bashku me Unreasonable Group nga SHBA-ja (investimi i parë i këtij fondi në një startup japonez), si dhe me pjesëmarrjen e TAUNS Laboratories, Daiwa House Industry dhe Aozora Bank Group. Me këtë raund, totali i fondeve të mbledhura nga Craif arrin në 57 milionë dollarë. Historia e Craif filloi kur Onose, i motivuar nga eksperiencat personale me kancerin në familjen e tij, vendosi të kontribuonte në këtë fushë. Vetëm një muaj pasi u njohën, ai dhe profesori i asociuar Takao Yasui nga Universiteti i Nagoyas bashkëthemeluan kompaninë. Yasui kishte zhvilluar një metodë inovative për zbulimin e hershëm të kancerit përmes biomarkerëve në urinë. Onose theksoi se zbulimi i hershëm i sëmundjeve të trajtueshme mbetet sfidues, pasi testet tradicionale si analizat e gjakut janë invazive dhe shpesh shmangen nga njerëzit. Gjithashtu, qasja e kufizuar në qendra mjekësore e bën të vështirë për individët që të kryejnë teste për kancerin. Craif synon ta tejkalojë këtë boshllëk duke ofruar një test jo-invaziv të bazuar në urinë, që mundëson zbulimin e kancerit që në fazat shumë të hershme, madje që në Stadin 1.
“Testi mund të kryhet nga rehatia e shtëpisë dhe bazohet në analizën e avancuar të mikroRNA-së, duke e bërë zbulimin e hershëm më të aksesueshëm dhe më efektiv,” shpjegon Onose. “Përdoruesit tanë janë individë të kujdesshëm për shëndetin, të cilët shqetësohen për kancerin, por e kanë të vështirë t’i përmbahen ekzaminimeve tradicionale për shkak të mungesës së kohës, kostos dhe aksesit.” Në industrinë e zbulimit të hershëm të kancerit operojnë disa startup-e të tjera si Grail, Freenome, DELFI Diagnostics dhe Clearnote Health. Çfarë e veçon Craif është përdorimi i mikroRNA-së si biomarker (krahasuar me cfDNA – ADN pa qeliza, që përdoret nga shumica e konkurrentëve) dhe fakti që testi kryhet përmes urinës.
Lexo edhe:TEMU: Fenomen kalimtar apo konkurrent serioz në të ardhmen e blerjeve online?
“miRNA, që fitoi vëmendje të shtuar pas lidhjes së saj me Çmimin Nobel 2024, është e njohur për rolin e rëndësishëm në biologjinë e kancerit që në fazat më të hershme,” tha Onose. “Ndryshe nga cfDNA, mikroRNA sekretohet në mënyrë aktive nga qelizat e kancerit në fazat fillestare, çka e bën atë veçanërisht të përshtatshme për zbulimin e hershëm.” Një tjetër element që e bën të veçantë produktin është përdorimi i urinës. Sipas Onose, urina është një mostër e thjeshtë dhe jo-invazive, me më pak ndotës se mostrat e tjera, çka e bën sinjalin biomarker më të pastër dhe zvogëlon gabimet e matjes, si ato që ndodhin nga hemoliza në analizat e gjakut. Kjo gjithashtu ndihmon në uljen e kostove të testimeve.
Produkti i parë i Craif, miSignal, është një test që detekton riskun për shtatë lloje të ndryshme kanceri (pankreas, zorrë të trashë, mushkëri, stomak, ezofag, gji dhe vezore) përmes analizës së mikroRNA-së në urinë, dhe aktualisht po gjeneron të ardhura në Japoni. Produktet shpërndahen përmes klinikave, farmacive, shitjeve direkte tek konsumatorët dhe programeve të mirëqenies në kompani, duke krijuar burime të ndryshme të ardhurash. “Sot bashkëpunojmë me mbi 1000 institucione mjekësore dhe rreth 600 farmaci në Japoni, duke shërbyer afërsisht 20,000 përdorues. Ekipi ynë përbëhet nga 73 punonjës të përkushtuar,” deklaroi Onose. Modeli i të ardhurave ofron si teste të vetme, ashtu edhe paketa abonimi për teste të rregullta, me shumë përdorues që zgjedhin opsionin e abonimit. Kompania gjeneroi 5 milionë dollarë të ardhura në vitin 2024 dhe synon të arrijë 15 milionë deri në fund të këtij viti. Në planet e saj të zgjerimit, Craif synon që këtë vit të zgjerojë miSignal për të përfshirë deri në dhjetë lloje të ndryshme kanceri. Gjithashtu, kompania po përgatitet të përdorë teknologjinë e saj për zbulimin e hershëm të sëmundjeve jo-kanceroze, si çrregullimet neurodegjenerative, përfshirë dementian.
Craif ka laboratorin e saj të R&D në Irvine, Kaliforni dhe planifikon të hapë një zyrë të re në San Diego për të menaxhuar operacionet e biznesit. Fondi i ri do të përdoret për hyrjen në tregun amerikan me testin për zbulimin e hershëm të kancerit të bazuar në mikroRNA, me synimin për të përfunduar provat klinike në SHBA deri në vitin 2029 dhe për të aplikuar për miratimin nga FDA. Aktualisht, Craif ka nisur grumbullimin e mostrave për kancerin pankreatik në bashkëpunim me 30 institucione mjekësore në 15 shtete amerikane.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
